У Менскім гарадскім судзе 21 лютага распачаўся палітычна матываваны суд над каталіцкім вернікам Уладзіславам Беладзедам. Каля будынку суда сабраліся еўрапейская дыпламаты, каб падтрымаць мужчыну. Пра гэта паведаміла амбасада Нямеччыны ў Беларусі.
«Сёння (21.02) у Менску адбудзецца судовае пасяджэнне ў дачыненні да несправядліва зняволенага Уладзіслава Беладзеда. Абвінавачанні, вылучаныя супраць яго, – несправядлівасць. Яны матываваныя палітычна. Прадстаўнік Амбасады Нямеччыны ў Менску, а таксама прадстаўнікі іншых дыпламатычных місіяў сёння адправіліся да будынку суда, каб выказаць салідарнасць з Уладзіславам Беладзедам.
Федэральны ўрад Нямеччыны патрабуе вызвалення ўсіх палітычных зняволеных у Беларусі», – піша амбасада.
Уладзіслаў Беладзед – каталіцкі вернік, выпускнік Інстытуту тэалогіі БДУ, выкладчык катэхізісу ў менскім Архікафедральным саборы Найсвяцейшага Імя Найсвяцейшай Дзевы Марыі. Ён быў затрыманы 31 траўня 2023 года за тое, што падчас мірных пратэстаў 2020 года актыўна ўдзельнічаў у агульных хрысціянскіх малітвах аб спыненні гвалту і беззаконня.
Уладзіслава абвінавачваюць паводле чатырох артыкулаў Крымінальнага кодэксу. Да крымінальнай справы яго некалькі разоў запар арыштоўвалі на 15 содняў.
«Пасля 30 содняў, праведзеных на Акрэсціна, Беладзед выглядаў як чалавек, які падвяргаўся катаванням і бесчалавечнаму абыходжанню. Вядома, што Уладзіслаў мае сур’ёзныя праблемы са здароўем», – пішуць праваабаронцы «Вясны».
Справу разглядае суддзя Алена Ананіч.
Арсен Рудэнка belsat.eu
