Шосты дзень у Беларусі трывае сумеснае з расейцамі трэнаванне вайсковай авіяцыі
Мінабароны Беларусі паведаміла пра працяг сумеснага з расейскай арміяй лётна-тактычнага трэнавання. «Сёння авіяцыйныя фармаванні выконваюць задачы паводле прызначэння», – сказалі ў прэс-службе ведамства.
Паведамленне пра працяг вучэнняў міністэрства абароны Беларусі апублікавала ў сваім Telegram-канале. Будуць задзейнічаныя ўсе аэрадромы ваенна-паветраных сілаў і войскаў СПА.
«Сёння ў рамках сумеснага лётна-тактычнага вучэння Узброеных сілаў Рэспублікі Беларусь і Расейскай Федэрацыі авіяцыйныя фармаванні працягваюць выконваць задачы паводле прызначэння», – праінфармавалі ў Мінабароны.
Гэтыя трэнаванні пачаліся ў панядзелак, 16 студзеня. Плануецца, што скончацца яны 1 лютага.
Афіцыйныя асобы сцвярджаюць, што «вучэнне мае выключна абарончы характар».
19 студзеня медыі напісалі пра інцыдэнт з самалётам, які ўдзельнічаў у трэнаванні. Паводле неафіцыйных звестак, у МіГ-31К загарэўся рухавік. Жыхары некалькіх гарадоў, у тым ліку Маладзечна і Вялейкі, чулі выбух. Верагодна, гэта быў пампаж самалёта: парушэнне працы рухавіка, што суправаджаецца мікравыбухамі праз супрацьплынь газаў.
Сяргей Крот belsat.eu
