Прагрэс, як вядома, не стаіць на месцы, а едзе – у тым ліку і на таксі. У Горадні пасажыры атрымалі магчымасць аплаціць паездку, нават не маючы ані рубля ў кішэні.
Паводле новаўвядзення ад мясцовай фірмы “107 Бертель”, цяпер дастаткова папросту мець з сабою банкаўскую картку, якую трэба паднесці да мабільнага тэрміналу – і патрэбная сума спісваецца на рахунак кіроўцы. Галоўнае – загадзя папярэдзіць дыспетчара пра безнаяўны разлік.
{movie}Безнаяўнае таксі |right|17130{/movie}
З трохсот пяцідзесяці аўтамабіляў фірмы тэрміналамі абсталяваныя 200. Цягам месяца разлічвацца карткаю можна будзе і ў астатніх. У планах – падключэнне аплаты праз “Ўэбмані” ды СМС.
Кіроўца Дзяніс жа сярод плюсаў новаўвядзення найперш называе ашчаджаны час – і свой, і пасажыра. Адным словам, хутка, надзейна і… бяспечна!
І яшчэ адна карысць ад безнаяўнага праезду: цяпер таксіста змогуць абрабаваць, бадай, толькі хакеры. Як той казаў, няма грошай – няма праблемаў!
Валеры Руселік, “Белсат”, Горадня