«Пашкоджаныя васьміпавярховік і вытворчы цэх». 5 асобаў загінулі ў Харкаве пасля ўдару расейскага войска
Расея атакавала ў Харкаве прамысловы будынак. У выніку ўдару загінулі 5 асобаў, пацярпелі 8, паведаміў кіраўнік абласной дзяржаўнай адміністрацыі Алег Сынегубаў. Пад заваламі яшчэ могуць заставацца людзі, таму нельга выключаць, што лік ахвяраў павялічыцца.
«Вораг абстраляў горад – пашкоджаныя васьміпавярховік і вытворчы цэх. Пажар ахапіў больш за 1000 квадратных метраў. Звычайная друкарня, цэх вытворчасці мэблі і лакафарбавай прадукцыі», – напісаў у Facebook кіраўнік следчага ўпраўлення харкаўскай паліцыі Сяргей Балвінаў.
Паводле папярэдніх звестак, удар быў нанесены ракетаю «паветра – зямля» X-59.
Ратавальнай аперацыі перашкаджаў моцны пажар. Паведамлялася, што пад заваламі можа быць 10 асобаў.
Кіраўнік абласной дзяржаўнай адміністрацыі Алег Сынегубаў у сваім Telegram-канале напісаў, што ў выніку загінулі 5 асобаў:
«Лік пацярпелых вырас да 8. 7 з іх шпіталізаваныя, адна асоба атрымала дапамогу на месцы».
Пошукавая аперацыя працягваецца, таму лік ахвяраў можа павялічыцца.
Сцяпан Кубік belsat.eu
