У Менскім гарадскім судзе пачаўся завочны працэс супраць Аляксандры Герасімені і Аляксандра Апейкіна, перадае БелТА. Іх вінавацяць у закліках да санкцыяў.
Стваральнікам Беларускага фонду спартовай салідарнасці пагражае ад 4 да 12 гадоў – гэткае пакаранне прадугледжвае частка 3-яя артыкулу 361 «Заклікі да санкцыяў ды іншых дзеянняў, скіраваных на прычыненне шкоды нацыянальнай бяспецы Рэспублікі Беларусь».
Аляксандра Герасіменя і Аляксандр Апейкін цяпер за мяжою. БелТА піша, што фігурантаў «апавясцілі належным чынам, але ў суд яны не з’явіліся». На пасяджэнні прысутнічаюць дзяржаўны абвінаваўца, адвакаты, прадстаўнікі грамадзянскага пазоўцы.
Справу разглядаюць у адкрытым рэжыме.
Шкоду ад «злачынных дзеянняў» Герасімені і Апейкіна ацанілі на 853 тысячы беларускіх рублёў. Як заявіў пракурор, беларускі арганізатар чэмпіянату Еўропы па роварным спорце на трэку зрабіў унёсак 200 тысяч еўраў, каб гарантаваць правядзенне турніру. Але спаборніцтвы скасаваліся, а грошай не вярнулі. Бок абвінавачання мяркуе, што чэмпіянату не правялі ў Беларусі акурат дзякуючы заклікам Герасімені ды Апейкіна.
12 снежня ў Менскім гарадскім судзе пачаўся першы завочны суд – паводле справы адміністратараў «Чорнай кнігі Беларусі». Усе фігуранты – Яніна Сазановіч, Дзмітрый Навоша, Данііл Багдановіч, Валерыя Занямонская і Вольга Высоцкая – таксама за мяжою.
Гэтак званае спецыяльнае вядзенне ўвялі ў Беларусі ўлетку. Завочны суд пагражае тым, каго вінавацяць паводле 48 «экстрэмісцкіх» крымінальных артыкулаў і зʼехаў з краіны.
Сяргей Крот belsat.eu