Аддзел прымусовага выканання Першамайскага раёну сталіцы выставіў на аўкцыён лецішча 75-гадовай Ніны Багінскай. Пра гэта стала вядома пасля з’яўлення адпаведнага лоту на сайце «БелЮрЗабеспячэння».
У садовым таварыстве «Фізтэх» у Пухавіцкім раёне выставілі на продаж участак плошчай 4,5 соткі. Надзел належыць грамадскай дзяячцы Ніне Багінскай. Лецішча арыштавалі судовыя выканаўцы яшчэ ў 2016 годзе. Пачатковы кошт участку складае 693 рублі, аўкцыён адбудзецца 10 лістапада.
Ніна Багінская вядомая сваёй прынцыповай пазіцыяй. Яна брала ўдзел у шматлікіх акцыях пратэсту і выходзіла з бел-чырвона-белым сцягам у шмат якіх месцах сталіцы. Жанчыну неаднаразова затрымвалі і судзілі, але яна прынцыпова адмаўляецца аплочваць штрафы.
Алена Аляксандрава belsat.eu
