Украіна і Расея чарговы раз абмяняліся ваеннапалоннымі. Украіна вызваліла з палону 108 жанчын, у тым ліку 96 вайсковак і 12 цывільных. Пра гэта паведаміў кіраўнік Офісу прэзідэнта Андрэй Ермак.
«Нам удалося правесці не проста чарговы маштабны абмен палоннымі. Гэта ўпершыню цалкам жаночы абмен. Сёння ўдалося вызваліць з палону 108 жанчын», – сказаў Андрэй Ермак.
У выніку абмену ўдалося вызваліць 35 прадстаўніц Збройных сілаў Украіны, 32 абаронцы з шэрагаў Вайскова-марскіх сілаў, 12 – з Сілаў тэрытарыяльнай абароны ЗСУ, 8 – з Нацыянальнай гвардыі Украіны (у тым ліку 2 з палка «Азоў»), 5 – з Дзяржаўнай спецыяльнай службы транспарту, 4 – з Дзяржаўнай памежнай службы Украіны. Агулам 11 афіцэраў, 85 шараговых і сяржантаў.
Таксама сярод вызваленых – 37 жанчын, эвакуяваных з «Азоўсталі», а таксама грамадзянкі, якіх незаконна затрымалі на часова акупаваных украінскіх тэрыторыях яшчэ да шырокамаштабнага ўварвання РФ за «занадта праўкраінскую пазіцыю».
Раней «кіраўнік ДНР» Дзяніс Пушылін паведамляў, што абмен прайшоў паводле формулы 110 на 110. Паводле яго, яны вярнулі 80 цывільных маракоў, 30 вайскоўцаў з «ДНР, ЛНР ды іншых рэгіёнаў РФ». Няроўны абмен расейскае Міністэрства абароны растлумачыла тым, што дзве ўкраінскія жанчыны перад абменам «добраахвотна адмовіліся вяртацца ва Украіну, пажадаўшы застацца ў РФ».
Папярэдні абмен адбыўся 13 кастрычніка. Тады з палону былі вызваленыя 20 украінскіх і 20 расейскіх вайскоўцаў. 11 кастрычніка ва Украіну вярнуліся 32 вайскоўцы ЗСУ, а таксама цела ізраільцяніна Дзмітрыя Фіялкі, які быў дзіцячым футбольным трэнерам львоўскага «Дынама», а пасля пачатку расейскага ўварвання ва Украіну пайшоў добраахвотнікам на вайну.
Алена Рувіна belsat.eu
