Міжнародная энергетычная агенцыя: Сусветны попыт на вугаль у 2022 пабʼе мінулы рэкорд
Сусветны попыт на вугаль вырасце ў 2022 годзе дастаткова, каб падштурхнуць яго да гістарычнага максімуму на фоне энергетычнага крызісу. Аб гэтым гаворыцца ў новай справаздачы Міжнароднай энергетычнай агенцыі (МЭА), якая прагназуе, што сусветнае спажыванне вугалю застанецца на аналагічным узроўні ў наступныя гады пры адсутнасці больш моцных намаганняў па паскарэнні пераходу да чыстай энергіі.
Сусветнае выкарыстанне вугалю вырасце на 1,2% у 2022 годзе, упершыню перавысіўшы 8 мільярдаў тон за адзін год і зацямніўшы папярэдні рэкорд, усталяваны ў 2013 годзе. Аб гэтым гаворыцца ў справаздачы «Вугаль 2022», штогадовай справаздачы МЭА аб рынку ў гэтым сектары.
Грунтуючыся на бягучых рынкавых тэндэнцыях, у справаздачы прагназуецца, што «спажыванне вугалю застанецца на гэтым узроўні да 2025 года, паколькі падзенне на развітых рынках кампенсуецца працяглым высокім попытам у азіяцкіх краінах, якія развіваюцца. Гэта азначае, што вугаль па-ранейшаму застанецца самай вялікай крыніцай выкідаў вуглякіслага газу ў глабальнай энергетычнай сістэме».
«Свет блізкі да піка выкарыстання выкапнёвага паліва, і вугаль павінен быць першым, што будзе зніжацца, але мы яшчэ не дасягнулі гэтага», – сказаў Кейсуке Садаморы, дырэктар па энергетычных рынках і бяспецы МЭА.
Паводле Садаморы, «попыт на вугаль упарты і, верагодна, дасягне гістарычнага максімуму ў гэтым годзе, падштурхоўваючы глабальныя выкіды. У той жа час ёсць шмат прыкмет таго, што сённяшні крызіс паскарае разгортванне аднаўляльных крыніц энергіі, энергаэфектыўнасці і цеплавых помпаў – і гэта знізіць попыт на вугаль у бліжэйшыя гады. Палітыка ўрада будзе мець ключавое значэнне для забеспячэння бяспечнага і ўстойлівага шляху наперад».
МАЭ адзначае ў справаздачы, што ў 2022 годзе міжнародны рынак вугалю заставаўся напружаным, а попыт на вугаль для вытворчасці электраэнергіі павінен дасягнуць новага рэкорду. Цэны на вугаль падняліся да беспрэцэдэнтных узроўняў у сакавіку, а затым зноў у чэрвені, падштурхнуты да росту з-за напружання, «выкліканага сусветным энергетычным крызісам, асабліва скокамі коштаў на прыродны газ, а таксама неспрыяльнымі ўмовамі надворʼя ў Аўстраліі, ключавым міжнародным пастаўшчыку». Еўропа, якая моцна пацярпела ад рэзкага скарачэння Расеяй патокаў прыроднага газу, збіраецца павялічыць спажыванне вугалю другі год запар. Аднак чакаецца, што да 2025 года еўрапейскі попыт на вугаль знізіцца ніжэй за ўзровень 2020 года.
Тры найбуйнейшыя вытворцы вугалю ў свеце – Кітай, Індыя і Інданезія – усе пабʼюць рэкорды вытворчасці ў 2022 годзе. Аднак у справаздачы адзначаецца, што, нягледзячы на высокія цэны і камфортную маржу для вытворцаў вугалю, няма ніякіх прыкмет росту інвестыцый у вугальныя праекты, арыентаваныя на экспарт. «Гэта сведчыць аб асцярожнасці інвестараў і горназдабыўных кампаній адносна сярэднетэрміновых і доўгатэрміновых перспектыў вугалю», – падсумоўваецца ў справаздачы.
Антон Тачняк belsat.eu
