Прадпрымальнікі пагражаюць агульнанацыянальным страйкам


https://youtu.be/O_RnLRRP7dc
Бізнесоўцаў не задавальняюць новыя стандарты сертыфікацыі прадукцыі, паводле якіх гандлярам давядзецца зазнаць дадатковыя выдаткі.

Прадпрымальнікі гавораць, што калі тэхнічны рэгламент Мытнага саюзу “Аб бяспецы прадукцыі лёгкай прамысловасці” набудзе моц 1 ліпеня без зменаў, то яны пойдуць у вымушаныя адпачынкі і спыняць выплату падаткаў. Пра гэта бізнесоўцы заявілі на сходзе прадстаўнікоў прадпрымальніцкіх аб’яднанняў з Менску, Маладзечна, Берасця, Гомлю, Віцебску і Магілёва.
{movie}Шумчанка: 99% прадпрымальнікаў стануць парушальнікамі закона аўтаматычна|right|11093{/movie}

Прадавец адказвае за вытворцу?

Паводле тэхнічнага рэгламенту, у Беларусі ўвядуць сістэму пацвярджэння адпаведнасці патрабаванням бяспекі тавараў лёгкай прамысловасці. На практыцы гэта азначае, што гандляры будуць вымушаныя аддаваць частку тавару на экспертызу ў лабараторыю, пры гэтым пасля гэты тавар ужо немагчыма будзе прадаць.

Старшыня аб’яднання бізнесоўцаў “Перспектыва” Анатоль Шумчанка на сходзе зазначыў, што практычна ўсе індывідуальныя прадпрымальнікі, якія маюць справу з прадукцыяй лёгкай прамысловасці з трэціх краінаў, пасля ўступлення 1 ліпеня ў сілу тэхрэгламенту “пазбавяцца магчымасці займацца бізнесам легальна, 99 % будуць вымушаныя спыніць сваю дзейнасць”.

{movie}Шумчанка: Прадпрымальнікі гатовыя страйкаваць|right|11094{/movie}
Удзельнікі сходу пацвердзілі сваё галоўнае патрабаванне да кіраўніцтва МС – “забавязаць вытворцаў тавараў лёгкай прамысловасці, хто зацікаўлены пастаўляць свой тавар у краіны МС, сертыфікаваць сваю прадукцыю самастойна, а не перакладваць гэтую дарагую працэдуру на канцавое звяно ў гэтым ланцузе – прадпрымальніка”.

Пры гэтым, паводле бізнесоўцаў, у Расеі палажэнні рэгламенту поўнасцю ігнаруюцца, што ставіць айчынных прадпрымальнікаў у няроўныя ўмовы.

Да прадпрымальнікаў прыслухаюцца?

Дэпартамент прадпрымальніцтва Міністэрства эканомікі Беларусі папрасіў беларускіх прадпрымальнікаў даць доказы таго, што ў Расеі не выконваюцца патрабаванні тэхнічнага рэгламенту.

Як паведаміў Шумчанка, “Перспектыва” забавязалася даць такую інфармацыю да 12 чэрвеня. У сваю чаргу дэпартамент Мінэканомікі цягам 2 наступных тыдняў будзе працаваць над арганізацыяй круглага стала наконт гэтай праблемы.

Тэрмін увядзення патрабаванняў тэхрэгламенту ў Беларусі ўжо аднойчы пераносіўся. Аднак бізнесоўцы патрабуюць перагледзець некаторыя яго палажэнні. Пра сур’ёзнасць намераў сведчыць тое, што ўжо адбыўся аднадзённы страйк. Прадпрымальнікі пратэставалі ў Віцебску 6 чэрвеня.

МЛ, паводле БелаПАН
https://youtu.be/ptaco7ZXPmA

Глядзі таксама
Каментары