Кіраўнікі ЗША, Італіі, Францыі, Брытаніі і Нямеччыны ў супольнай заяве падтрымалі Ізраіль
Лідары Францыі, Нямеччыны, Італіі, Вялікай Брытаніі і Злучаных Штатаў Амерыкі апублікавалі супольную заяву адносна вайны паміж сектарам Газа і Ізраілем.
Прэзідэнт Францыі Эманюэль Макрон, канцлер Нямеччыны Оляф Шольц, прэм’ер-міністр Італіі Джорджа Мэлёні, прэмʼер-міністр Вялікай Брытаніі Рышы Сунак і прэзідэнт ЗША Джо Байдэн выказалі «цвёрдае і супольнае падтрыманне Дзяржаве Ізраіль», а таксама «адназначнае асуджэнне «Хамасу» і яго жахлівых тэрарыстычных актаў».
«Тэрарыстычныя дзеянні «Хамасу» не маюць ні апраўдання, ні легітымнасці і павінны быць усеагульна асуджаныя. Тэрору ніколі не можа быць апраўдання. У апошнія дні свет з жахам назіраў, як тэрарысты «Хамасу» выразалі семʼі ў іхных дамах, вынішчылі больш як 200 маладых людзей, якія атрымлівалі асалоду ад музычнага фестывалю, і выкралі пажылых жанчын, дзяцей і цэлыя семʼі, якія цяпер утрымліваюцца як закладнікі», – гаворыцца ў заяве.
Лідары краінаў падтрымалі Ізраіль у яго намаганнях для абароны і перасцераглі яго ворагаў ад імкнення «выкарыстаць гэтыя напады для атрымання выгады».
Лідары заходніх краінаў прызналі законныя спадзяванні і правы палестынскага народу, але дадалі: «Хамас» не рэпрэзентуе гэтых імкненняў і не прапаноўвае палестынскаму народу нічога, акрамя яшчэ большага тэрору і кровапраліцця».
Тэрарысты групоўкі «Хамас» з сектару Газа 7 кастрычніка пачалі маштабны напад на Ізраіль, у выніку краіна перайшла ў стан вайны. Загінулі не менш за тысячу чалавек, сотні былі цяжка параненыя, але наўрад ці гэта канчатковыя лічбы: Ізраіль абвясціў аб аднаўленні кантролю над усімі паселішчамі каля Газы, аднак баі працягваюцца.
Якуб Хруст belsat.eu
