Вялікая Брытанія абвясціла пра санкцыі супраць сямі расейскіх алігархаў, разам з уладальнікам лонданскага футбольнага клубу «Чэлсі» Раманам Абрамовічам. Пра гэта паведамляе брытанскі ўрад.
Міністр замежных справаў Ліз Трас 10 сакавіка аб’явіла пра поўнае замарожванне актываў ды забарону на паездкі сямі самых багатых і ўплывовых расейскіх алігархаў, чые бізнес-імперыі, багацце ды сувязі шчыльна звязаны з Крамлём.
У межах намаганняў Лондану ў справе ізаляцыі Пуціна ды ягонага атачэння гэтым алігархам, чый сукупны ўласны капітал складае каля 15 мільярдаў фунтаў стэрлінгаў (каля 20 мільярдаў долараў), замарозяць актывы ў Вялікай Брытаніі, ім забароняць заязджаць у краіну, а грамадзянам і кампаніям Аб’яднанага Каралеўства забароняць мець з імі сувязі.
Апроч Абрамовіча, у санкцыйны спіс трапілі Алег Дзерыпаска («En+ Group»), Ігар Сечын («Роснефть»), Андрэй Косцін (ВТБ), Аляксей Мілер («Газпром»), Мікалай Токараў («Транснефть»), Дзмітрый Лебедзеў («Банк Россия»).
«Сённяшнія санкцыі яшчэ раз паказваюць, што алігархам і клептакратам не месца ні ў нашай эканоміцы, ні ў грамадстве. Маючы шчыльныя сувязі з Пуціным, яны суўдзельнікі ягонай агрэсіі. На іхных руках кроў украінскага народу», – заявіла міністр замежных справаў Ліз Траc.
Пры гэтым футбольнаму клубу «Чэлсі» выдалі адмысловую ліцэнзію, якая дазваляе працягваць звязаную з футболам дзейнасць.
ПС belsat.eu
