Скарынаўская бібліятэка ў Лондане стварае Музей Адраджэння і запрашае да ўдзелу ўсіх ахвочых
Скарынаўская бібліятэка ў Лондане абвесціла на сваёй старонцы ў Фэйсбуку пра пачатак рэканструкцыі аднаго са сваіх памяшканняў, у якім размесціцца новы Музей Адраджэння. Бібліятэка будзе радая любой дапамозе ў рэалізацыі праекту.
Музей Адраджэння будзе апавядаць пра беларускую гісторыю і культуру з канца ХІХ стагоддзя і да сённяшніх дзён. Экспанаты музею будуць выстаўленыя не толькі ў адрэканструяванай залі, але і ў віртуальнай прасторы.
«Мы запрашаем усіх нашых сяброў і добразычліўцаў далучыцца да гэтага амбітнага праекту», – гаворыцца ў абвестцы.
Вы можаце:
- падтрымаць праект фінансава (дэталі можна знайсці тут);
- перадаць экспанаты для музею;
- дапамагчы з алічбоўкай дакументаў;
- прафэсійна фатаграфаваць экспанаты;
- рэдагаваць артыкулы для вэбсайту музею;
- паўдзельнічаць у будаўніцтве і прыборцы.
Усіх зацікаўленых просяць пісаць па адрасе: library@skaryna.org.uk
Беларуская бібліятэка і музей імя Францыска Скарыны – грамадска-культурны асяродак у Лондане. Адкрылася ў 1971 годзе. У 1979 годзе атрымала статус «незалежнай навукова-харытатыўнай установы» і з’яўляецца «уласнасцю ўсіх беларусаў».
Бібліятэка адкрытая для ўсіх, хто цікавіцца беларусістыкай незалежна ад нацыянальнасці. Аб’ядноўвае беларускіх эмігрантаў і брытанскіх вучоных-беларусістаў. Існуе пераважна на ахвяраванні.
Бібліятэка і музей займаюць 8 пакояў, у якіх захоўваецца каля 40 тысяч тамоў кніг і камплектаў газет і часопісаў. Сярод іх – фрагмент першай кнігі «Царствы» Скарыны, Статут Вялікага княства Літоўскага 1588, рэдкія беларускія выданні, надрукаваныя ў Куцейне, Вільні і Супраслі, першадрукі зборнікаў Багдановіча, Буйло, Купалы і інш.
Марыя Міхалевіч belsat.eu
