Кіраўнік місіі дэмакратычнай Беларусі ў Кіеве Генадзь Манько падчас Варшаўскага форуму бяспекі адказаў на пытанні «Белсату» аб разбурэнні ва ўкраінскай сталіцы мемарыялу беларускім добраахвотнікам, якія загінулі за незалежнасць Украіны.
Генадзь Манько адзначыў, што ў Кіеве разбураны не адзін помнік. Паводле яго, з Сафійскай плошчы ўкраінскай сталіцы таксама прыбралі фотаздымкі беларусаў.
«Для мяне гэта бачыцца як акцыя ФСБ/КДБ. Інспіраваная імі, дзе выкарыстаныя або карысныя ідыёты, або 100-адсоткавая правакацыя. Задача стаіць забіць клін паміж беларускім і ўкраінскімі народамі», – сказаў ён.
Пры гэтым, на ягоную думку, рэакцыя некаторых украінцаў у сацсетках паказвае, што разбураць мемарыялы беларусам, якія ваявалі і загінулі ва Украіне за волю, – «гэта за межамі». Паводле яго, украінцы вельмі добра ставяцца да беларусаў, якія ваююць у складзе ЗСУ.
Бліжэйшым часам Манько плануе наведаць Кіеў, каб сустрэцца з кіраўніцтвам каледжу Кіеўскага нацыянальнага ўніверсітэту тэхналогіяў і дызайну, на сцяне якога быў усталяваны помнік беларускім ваярам, каб высветліць прычыны яго разбурэння. Таксама паспрабуе сустрэцца з мэрам Кіева.
«Пакідаць і не рэагаваць нельга», падкрэсліў ён, бо «трэба гэтае пытанне ўрэгуляваць, каб надалей такія правакацыі не здараліся».
Нагадаем, днямі стала вядома, што ў Кіеве пад выглядам змагання з краінай-агрэсарам дамагліся частковага разбурэння мемарыялу, пастаўленага ў памяць пра беларусаў, якія загінулі ў вайне за Украіну. З крытыкай такіх дзеянняў вельмі рэзка выступіла ўкраінская блогерка Хрыстына Кафка. Яна адзначыла, што людзі, якія дамагаліся разбурэння помніку, знішчаюць украінскую ж гісторыю і нічога «не ведаюць у сваім жыцці».
У сваю чаргу абраная прэзідэнтка Беларусі Святлана Ціханоўская назвала разбурэнне мемарыялу вандалізмам.
«Гэта вельмі сумна, што нейкія рэчы робяцца як быццам у супрацьстаянне Лукашэнку, а насамрэч збіваюць баявы дух беларусаў. Бо гэты мемарыял за ўнёсак беларусаў у барацьбу супраць расейскай агрэсіі», – падкрэсліла Ціханоўская.
Беларускія добраахвотнікі ваююць на баку Украіны з 2014 года. З таго часу загінулі ўжо некалькі дзясяткаў беларусаў. На сёння беларусы ваююць у складзе палка імя Кастуся Каліноўскага, Беларускага добраахвотніцкага корпусу, Першай асобнай дэсантна-штурмавой роты і шэрагу іншых падраздзяленняў ЗСУ.
Макар Мыш belsat.eu