У Міністэрстве аховы здароўя назвалі дыягназ, з якімі былі шпіталізаваныя ў дзіцячую інфекцыйную клінічную больніцу Менску сямёра вучняў ліцэю БНТУ.
«У юных пацыентаў пацвердзілі норавірус. Гэтая кішачная інфекцыя можа быць выкліканая невыкананнем правілаў асабістай гігіены навучэнцамі», – заявілі ў ведамстве.
Што такое норавірус?
Норавірус – адная з вядомых разнавіднасцяў кішачных вірусаў. Ён вельмі заразны: 10-100 часцінак віруса стае для заражэння. Вірус вылучаецца ад хворага чалавека з натуральнымі адпраўленнямі і іншымі выдзяленнямі, напрыклад, з ванітамі. Чалавек можа быць заразным цягам некалькіх тыдняў.
Асноўныя шляхі перадачы норавіруса:
- Кантактна-побытавы (праз нямытыя рукі, прадметы ўжытку, посуд і г. д.);
- Харчовы (з нямытай садавіной, гароднінай або харчамі, што інфікаваў хворы падчас гатавання ежы);
- Водны (з вадкасцю, якая змяшчае вірус);
- Паветрана-капежны (праз удыханне паветра, што змяшчае вірусныя часцінкі).
Характэрныя прыкметы захворвання – млосць, ваніты, нязначнае павышэнне тэмпературы цела, дыярэя, сімптомы агульнай інтаксікацыі, якія выяўляюцца ў слабасці і бледнасці скурных пакроваў. Сімптомы могуць працягвацца некалькі дзён, і калі ігнараваць і не змагацца з абязводжваннем арганізму, вынікам могуць быць сур’ёзныя наступствы.
Найбольш небяспечны норавірус для фізічна аслабленых асобаў, старых і дзяцей. Вядомыя нават выпадкі смерці ад гэтага віруса.
Раней паведамлялася, што ў шпіталь трапілі сямёра вучняў ліцэю БНТУ.
Якуб Хруст belsat.eu
