«Ісламская дзяржава» ўзяла адказнасць за тэракт у Іране, дзе загінулі дзясяткі людзей
Тэрарыстычная арганізацыя «Ісламская дзяржава» 4 студзеня ўзяла на сябе адказнасць за два выбухі, якія прагучалі напярэдадніна цырымоніі ў Іране ў памяць пра камандзіра Гасэма Салеймані.
Група апублікавала заяву на сваіх партнёрскіх каналах у Telegram, піша «Alarabiya».
Раней саюзная Ірану палестынская групоўка «Хамас» заявіла, што тэракт «служыць злавесным планам сіянісцкага ворага». А МЗС Ірану абяцала прыняць «неадкладныя прававыя і міжнародныя меры» праз ААН.
Генерал Салеймані гуляў ключавую ролю ва ўзмацненні ўплыву Ірану на Блізкім Усходзе і лічыўся адным з самых блізкіх паплечнікаў вярхоўнага лідара Ірану Алі Хамэнэі. Ён быў забіты ў 2020 годзе ў выніку ўдару амерыканскага беспілотніка.
Выбухі 3 студзеня адбыліся падчас мемарыяльнай цырымоніі, прымеркаванай да чацвёртай гадавіны забойства Салеймані. Закладзеная каля могілак Гользар-э Шахада выбухоўка была актываваная, калі натоўп з некалькіх сотняў чалавек праходзіў побач мячэці Сахеб аль-Заман. Ахвярамі выбуху сталі 84 асобы і 284 былі параненыя. Гэты самы вялікі тэракт у Іране паводле колькасці ахвяраў з 1978 года.
Якуб Хруст belsat.eu
