Міністэрства абароны апублікавала на сваім сайце кантрольныя лічбы прыёму курсантаў у вайсковыя навучальныя ўстановы на 2024 год.
З прыведзеных звестак вынікае, што ўсе вайсковыя ВНУ і факультэты Беларусі набяруць 1250 студэнтаў. Найбольш курсантаў, 687, сёлета плануе прыняць Вайсковая акадэмія. З іх 552 будуць вучыцца на патрэбы Узброеных сілаў, 44 – для Дзяржаўнага памежнага камітэту, 87 – для ўнутраных войскаў. 49 курсантаў будуць навучацца на запыт КДБ.
Вайсковыя факультэты ў іншых установах адукацыі павінныя будуць прыняць 563 курсанты. Найбольшы набор будзе ў БНТУ – 132 чалавекі, у БДУіР набяруць 125 курсантаў, на вайсковы факультэт БДУ – 71 курсант, у БДУТ – 63, у Беларускую дзяржаўную акадэмію авіяцыі – 57, на вайскова-медычны інстытут Беларускага дзяржаўнага медычнага ўніверсітэту – 55. Акадэмія МУС прыме 5 чалавек, універсітэт цывільнай абароны МНС – 2 чалавекі.
116 курсантаў будуць накіраваныя вучыцца ў Расею ў наступныя навучальныя ўстановы:
- Вайсковую акадэмію сувязі,
- Міхайлаўскую вайсковую акадэмію,
- Вайскова-касмічную акадэмію ім. А. Мажайскага,
- Вайскова-медычную акадэмію,
- Варонежскую вайскова-паветраную акадэмію,
- Яраслаўскую вучэльню супрацьпаветранай абароны,
- Чарапавецкі вайсковы ўніверсітэт радыёэлектронікі,
- Разанскую паветрана-дэсантную вучэльню,
- Новасібірскую камандную вучэльню,
- Вайсковы інстытут вайсковых дырыжораў Вайсковага ўніверсітэту ў Маскве.
Марыя Міхалевіч belsat.eu
