Зборная Беларусі па хакеі зазнала паразу ад Расеі з лікам 0:6. На матч прыйшоў адзін заўзятар
Зборная Беларусі завяршыла свой удзел у чэмпіянаце свету па хакеі ў Латвіі з разгромным паражэннем ад Расеі – 0:6.
Расейцы закінулі пяць шайбаў у першым перыядзе ўжо на 17-й хвіліне матчу. Першая ж шайба была ў браме зборнай Беларусі на 36-й секундзе.
Як адзначае расейскі спартовы партал «Сhampionat», «беларусы выглядалі зусім «мёртвымі», нават не спрабавалі адпавядаць расейскім хуткасцям і ўмешвацца ў кантроль шайбы нашых [расейскіх] хакеістаў».
У выніку зборная Беларусі заняла апошняе месца ў групе і атрымала толькі адну перамогу ў сямі матчах.
На сустрэчы дзвюх камандаў у Рызе прысутнічаў толькі адзін чалавек, пры дазволенай змяшчальнасці лядовай арэны 1058 гледачоў. Усяго на матч прадалі два квіткі.
«Рэдка бывае ў нас такое, раз на 15 гадоў, а тут такі шанец. Трэба схадзіць», – заявіў заўзятар, дадаўшы, што ён родам з Латвіі, аднак заўзее за Расею.
Пры гэтым на арэну маглі трапіць толькі жыхары Латвіі з сертыфікатам, які пацвярджае наяўнасць прышчэпкі ад каронавіруснай інфекцыі.
АД, belsat.eu
