Праваабаронцам «Вясны» стала вядома, што працэс у «справе TUT.by» пачнецца 9 студзеня. Справу разгледзіць суддзя Менскага гарадскога суда Валянціна Зянькевіч.
«Справу TUT.by» пачнуць разглядаць у Менскім гарадскім судзе 9 студзеня. Працэс будзе закрыты.
Фігурантаў пяцёра: галоўная рэдактарка Марына Золатава, былая генеральная дырэктарка Людміла Чэкіна, рэдактарка палітычна-эканамічнага блоку навінаў Вольга Лойка, журналістка Алена Талкачова і юрысконсульт Кацярына Ткачэнка.
Жанчын вінавацяць паводле розных крымінальных артыкулаў: «Ухіленне ад падаткаў», «Распальванне варожасці», «Заклікі да санкцыяў» і «Актыўны ўдзел у дзеяннях, што груба парушаюць грамадскі парадак».
Золатава і Чэкіна за кратамі з моманту затрымання ў траўні 2021 года. Лойку, Талкачову і Ткачэнку раней вызвалілі пад падпіску аб нявыездзе.
«Справу TUT.by» разгледзіць суддзя Валянціна Зянькевіч. Раней яна прыгаварыла да 4 гадоў калоніі колішняга пракурора Яўгена Бабаку, да 8 гадоў – топ-менеджара мабільнага аператара «Life» Арцёма Воўну, да 5 гадоў – актывістку Настассю Кухту, да 2,5 года – фігуранта «справы Зельцара» Віталя Рогача.
Сяргей Крот belsat.eu
