Плаціна Кахоўскае ГЭС і сама электрастанцыя – разбураныя. Вада наступае на ўкраінскія гарады і вёскі. Гэта адбылося ў выніку падрыву ўначы шостага чэрвеня. Памеры разбурэнняў дамбы сталі бачныя толькі раніцай. Блізу адзінаццатай гадзіны кіеўскага часу Кахоўская ГЭС цалкам апынулася пад вадою.
Глядзіце сюжэт у нашым відэа:
«У выніку падрыву машыннай залы знутры Кахоўская ГЭС цалкам разбураная. Станцыя аднаўленню не падлягае», – паведамляе «Укргідроенерго».
Пад ваду пайшла не толькі Кахоўская ГЭС, але і прылеглыя тэрыторыі. Станам на пятнаццатую гадзіну Кіеў паведаміў пра дваццаць чатыры падтопленыя населеныя пункты.
«Максімальны пік уздыму – гэта 14 гадзін. Вада працягвае прыбываць і ўсе, хто знаходзяцца ў зоне падтаплення, павінныя пакінуць гэтую тэрыторыю чым хутчэй тым лепш», – папярэджвае дарадца мэра Херсону Раман Галаўня.
Наймацней пацярпеў левы, ніжэйшы бераг Дняпра, акупаваны цяпер расейскімі войскамі. Так, цалкам затопленая Новая Кахоўка, у цэнтры якой плаваюць лебедзі. Пад ваду, разам са звярамі, пайшоў мясцовы заапарк «Казачная дуброва». Відаць, многія жывёліны загінулі. Зрэшты, кіраўнік акупацыйнай адміністрацыі Херсонскай вобласці Уладзімір Сальда не бачыць асаблівых праблемаў у надыходзе вады:
«Гэта ніякім чынам не адаб’ецца на жыцці Херсонскай вобласці. Нават эвакуацыя не спатрэбіцца, таму што жыхары знаходзяцца на сваіх месцах і аўтобусы якія ім накіравалі – не выкарыстоўваюць».
Аднак, паводле інфармацыі ўкраінскіх уладаў, на акупаваных тэрыторыях застаюцца дваццаць пяць тысяч асобаў, якія маюць патрэбу ў эвакуацыі. Дарадца мэра Херсону раіць ім не разлічваць на дапамогу расейскіх уладаў:
«Яны не маглі арганізаваць элементарныя рэчы: медычную або гуманітарную дапамогу. У такой сітуацыі першае, што яны будуць рабіць, – ратавацца. Ну, а людзі будуць кінутыя на волю лёсу. Таму, на жаль, тым асобам, якія знаходзяцца на акупаванай тэрыторыі, трэба максімальна зважаць толькі на сябе».
На падкантрольнай Кіеву тэрыторыі з затопленых мясцінаў, паводле агульных падлікаў, давядзецца вывезці блізу сямнаццаці тысяч асобаў. Прычым украінскія службы ратуюць не толькі людзей, але і хатніх гадаванцаў ды дзікіх жывёлінаў.
Ускладняецца выратавальная аперацыя абстрэламі з расейскага боку.
«Вельмі моцныя абстрэлы. Вельмі, – кажа па тэлефоне валанцёр з Херсона Андрэй Кісялёў. – Вось цяпер вы можаце іх чуць. Я сам раненне атрымаў, я ведаю. Апошнім часам абстрэлы пачасціліся».
Яшчэ адной небяспекай сталіся міны, у вялікай колькасці размешчаныя расейскімі вайскоўцамі на левым беразе на выпадак украінскага контрнаступу. Вада вымывае іх з грунту і пераносіць цячэннем. Некаторыя выбухаюць.
Хто менавіта знішчыў Кахоўскую ГЭС, дагэтуль дакладна не вядома. Кіеў і Масква ўскладаюць адказнасць адно на аднога.
«Няма ў Украіны такой зброі, якая можа гэтую дамбу разбурыць. Такога роду разбурэнні можна выклікаць толькі падрывам дамбы з дапамогай вялікага колькасці закладзенай выбухоўкі. Відавочна, так і было зроблена», – мяркуе вайсковы эксперт, аўтар тэлеграм-каналу «Peacemaker» Сяргей Мігдаль.
Станам на 19-ю гадзіну вада з Дняпра працягвае прыбываць праз рэшткі дамбы. На думку экспертаў, яе адыход можа заняць да трох дзён.
Ян Федаровіч, «Белсат»