Трагедыя ў Кіеве. У выніку начнога абстрэлу ўкраінскай сталіцы загінулі тры асобы. Сярод іх дзевяцігадовая дзяўчынка, ейная маці і яшчэ адна кіяўлянка. Не здолелі ўратавацца ад абломкаў збітай расейскай ракеты. Уваход у бамбасховішча аказаўся зачыненым падчас паветранай трывогі.
Глядзіце сюжэт у нашым відэа:
«…Мая жонка ўзяла дачку, і яны пабеглі пад уваход сюды. Уваход быў зачынены. Там ужо было пяць, можа дзесяць жанчын з дзецьмі. Ім ніхто не адчыняў. Яны стукалі. Досыць гучна стукалі! І потым папрасілі мяне збегаць вось сюды, пастукаць ахове ў надзеі, што, можа, нехта адчыніць дзверы. Пакуль я сюды бег, якраз і здарыўся выбух…» – кажа кіяўлянін Яраслаў Рабчук, жонка якога загінула.
Праца ўкрыццяў – адказнасць кіраўнікоў установаў, а таксама кіраўнікоў аддзелаў, у якіх яны размешчаныя, заявіў мэр Кіева Віталій Клічко. Да таго ж чыноўнік анансаваў рэйды паліцыі, якая зоймецца кантролем працы бамбасховішчаў у начны час.
Пакуль украінскія гарады абстрэльваюць з паветра, у самай гарачай кропцы фронту – на бахмуцкім кірунку – часовае зацішша. Гэта пацвердзіў камандуючы сухапутнымі войскамі ЗСУ Аляксандр Сырскі. Паводле генерала, сілы абароны Украіны прыпынілі прасоўванне па флангах вакол гораду і выконвалі іншыя важныя задачы.
«Я не выключаю, што іншымі задачамі для сіл абароны Украіны, пра якія казаў генерал Сырскі, можа быць менавіта ўладкаванне агнявых кропак і пазіцый для больш эфектыўнай паразы ўжо расейскіх акупантаў у самім Бахмуце», – заявіў вайскова-палітычны аглядальнік групы «Інфармацыйны супраціў» Аляксандр Каваленка.
Паралельна з гэтым з Бахмуту пачалі выходзіць баевікі ПВК Вагнэра. А тым часам Расейскі добраахвотніцкі корпус і легіён «Свабода Расеі» заявілі пра новы рэйд у Белгародскую вобласць.
Расейскія тэлеграм-каналы апублікавалі відэа, на якім, як сцвярджаюць аўтары, у Шабекіне работнікі дзяржустановаў палілі дакументы ў чаканні расейцаў, якія дапамагаюць Украіне. Неўзабаве пасля гэтага ў горадзе пачаліся баявыя дзеянні. Гарэлі інтэрнат і будынак гарадской адміністрацыі. У легіёне «Свабода Расеі» заявілі, што падчас рэйду знішчылі будынак мясцовай паліцыі.
«Раніцай сапраўды сёння быў здзейснены рэйд па знішчэнні ваеннага аб’екта, пад удар трапілі сам ваенны абʼект, гэта значыць воінскія часткі і часткі расгвардыі, якія знаходзіліся ў адным з будынкаў МУС», – распавёў палкоўнік запасу ЗСУ Раман Світан.
Улады Белгародскай вобласці прыступілі да эвакуацыі цэлага гораду Шабекіна з насельніцтвам 40 тысяч чалавек. Пакуль жыхароў вывозяць у Белгарад на гарадскі стадыён, разлічаны на тысячу чалавек. Але і ў самім Белгарадзе небяспечна. Гэтак, сёння ў горадзе прагрымеў выбух. Паводле губернатара вобласці Вячаслава Гладкова, на праезджую частку ўпаў беспілотнік. Пацярпелых даставілі ў шпіталь.
Руслан Ігнатовіч, «Белсат»
