«За сваю скуру трасуцца і баяцца рот адкрыць». Кіроўцу звольнілі, бо адмовіўся вазіць санкцыёнку ў Расею

Летась, паводле афіцыйнай статыстыкі, наймальнікі на буйных і сярэдніх прадпрыемствах краіны звольнілі каля 700 тысячаў чалавек. Колькі з іх былі звольненыя незаконна – не вядома. Калі вы разумееце, што працадаўца несправядлівы ў дачыненні вас, можна звярнуцца па дапамогу ў незалежны прафзвяз і пайсці ў суд. І пажадана – не адкладаць гэтай справы. Бо згодна з беларускім законам абскардзіць звальненне магчыма толькі цягам месяца.

Уладзімір Кабарыха працаваў кіроўцам-экспедытарам у прыватнай менскай кампаніі. Рэйсы былі пераважна ў Расею. Перавозіў малако і малочныя прадукты. Усё было добра, пакуль увоз харчоў з некаторых заводаў Беларусі не забаранілі. У 2017 годзе ў кампаніі знайшлі новую схему працы – шэрую.

«Пачалі выпісваць дакументы на Казахстан. Каб праскочыць мяжу, выязджалі левымі вакольнымі шляхамі ды разгружаліся пад Масквою, у Маскве амаль», – распавядае Уладзімір Кабарыха, які лічыць сябе незаконна звольненым.

Нібыта ў Казахстан малочку сталі адпраўляць праз дзень. Уладзімір не хацеў незаконна вазіць санкцыйныя прадукты. Таму з кіраўніцтвам здарыўся буйны канфлікт. Працадаўцы запэўнівалі кіроўцу, што хутка адмовяцца ад шэрых схемаў. Але абяцання не стрымалі. Аднойчы ў Расеі груз арыштавалі, і Уладзімір прастаяў на мяжы цэлы тыдзень. Аднак кіраўніцтву ўдалося ўсё развязаць. А Уладзіміру прапанавалі звольніцца.

«Чатыры гады ты даспадобы, ты найлепшы кіроўца, бо любыя рэйсы, цяжкія-нецяжкія, ты ўсё цягнеш, усё, што трэба, робіш. А раз ты пайшоў супраць, то ты не патрэбны тады», – кажа Уладзімір Кабарыха.

У кампаніі Уладзімір працаваў паводле бестэрміновай працоўнай дамовы. Сыходзіць з працы на ўласнае жаданне ён адмовіўся. Тады яго выправілі ў адпачынак на 77 дзён – адразу за ўсе гады працы. Пасля адпачынку Уладзімір прыйшоў у офіс, паведаміў, што гатовы працаваць, і чакаў паведамлення аб рэйсе. Цягам 4 гадоў пра тое паведамлялі па тэлефоне. Але гэтым разам 2 тыдні ніхто не тэлефанаваў – а потым мужчыну запрасілі ў офіс і звольнілі.

«Я ім наўпроставым тэкстам сказаў, я вам што прыбіральшчыца ці хто, што я ў офісе павінен сядзець?» – пытаецца кіроўца.

Уладзіміра звольнілі паводле артыкулу 42 Працоўнага кодэксу. Прасцей кажучы – за прагулы. Мірыцца з такім запісам у працоўнай кніжцы ён не захацеў. І звярнуўся ў суд. Выступіць у якасці сведкі ды распавесці, што сапраўды адбывалася ў кампаніі ды паводле якога графіку працавалі кіроўцы, пагадзіўся толькі адзін калега Уладзіміра. Пазней яго таксама папрасілі звольніцца. Астатнія работнікі сакрэты фірмы раскрываць адмовіліся.

«Бо шасцёркі! Бо за сваю скуру трасуцца і баяцца рот адкрыць», – кажа Уладзімір Кабарыха, які лічыць сябе незаконна звольненым.

У судзе Уладзімір Кабарыха, апроч таго, каб яго звальненне прызналі незаконным, прэтэндаваў і на грашовую кампенсацыю. Ён хацеў, каб кампанія вярнула яму 1000 рублёў, выдаткаваныя на адвакатаў. А таксама выплаціла кампенсацыю памерам дзесяціразовага сярэднямесячнага заробку – каля 7 тысячаў рублёў.

«Быццам бы і пацярпеў паразу, але з іншага боку яны мяне не зламалі, таму павінныя змагацца, павінныя даказваць, як па-іншаму жыць, калі ты бачыш, што несправядлівасць? Проста апусціць рукі?» – задаецца пытаннем кіроўца.

Згодна з беларускім законам, невыкананне работнікам працоўных абавязкаў з не залежных ад яго прычынаў не можа разглядацца як дысцыплінарная правіна. На бок Уладзіміра Кабарыхі стаў пракурор. Аднак суд падтрымаў працадаўцу, а не кіроўцу. Ва Уладзіміра быў дыктафонны запіс, які пацвярджае, што пасля адпачынку ён быў у кампаніі ды кантактаваў з кіраўніцтвам. Аднак разглядаць запіс у якасці доказаў суд не стаў.

«Кажу табе шчыра: цябе не хочуць тут бачыць, ні мы, ні калектыў!» – цытата з размова Уладзіміра Кабарыхі з намеснікам кіраўніка ТАА «Віва-Лагістык-Плюс».

Да лістапада ва Уладзіміра яшчэ ёсць час абскардзіць рашэнне суда. Таксама былы кіроўца звярнуўся ў пракуратуру з заяваю аб нелегальных перавозках санкцыйнай малочкі. Аднак гэтаю справай ніхто не зацікавіўся.

Беларусы рэдка адстойваюць свае правы і судзяцца з наймальнікам. А дарма. Калі суд прызнае, што вашае звальненне было незаконнае, то вас адновяць на працы і выплацяць сярэдні заробак за перыяд вымушанага прагулу. Калі ж аднаўленне вас на працы суд палічыць немагчымым або немэтазгодным – працадаўца мусіць выплаціць грашовую кампенсацыю памерам дзесяць сярэднямесячных заробкаў.

Таксама ў праграме «Асабісты капітал»:

  • Беларусы не асуджаюць тых, хто ўхіляецца ад аплаты падаткаў
  • Як беларусы зарабляюць на Радаўніцы?
  • Дамова падраду: што рабіць калі наймальнік не плоціць грошы?

Праграма «Асабісты капітал» цалкам:

Глядзіце праграму «Асабісты капітал» кожны панядзелак а 19:00 на тэлеканале «Белсат», а таксама онлайн на нашым сайце. Далучайцеся да нашых старонак ў Facebook ды Одноклассниках. Падпісвайцеся на нашу рассылку і раз на месяц вы будзеце атрымліваць ліст з чатырма найбольш карыснымі сюжэтамі «Асабістага капіталу».

Больш матэрыялаў

У Беларусі патрэбны цэнтр для крызісных сітуацыяў

«Беларусь паступова ператворыцца ў Прыднястроўе». Што выратуе эканоміку?

Колькі плацяць беларусы за міліцэйскі гвалт?


Грошы скончыліся. Як выжыць без іх?

«Каму гэтая інфармацыя што дасць?» Як ад беларусаў хаваюць сапраўдны маштаб эпідэміі

Грошы на чужой бядзе. Хто нажываецца на эпідэміі?

Новая нармальнасць. Якой будзе Беларусь пасля пандэміі?

Каронакрызіс. Параўналі дзяржаўную дапамогу ў Беларусі ды іншых краінах