Калі прытрымлівацца дыеты трэба, а ідэі скончыліся, на дапамогу прыходзіць кулінарна-тэрапеўтычнае шоу «Я не буду гэтага есці».
У праекце «Я не буду гэтага есці» вядомыя людзі дзеляцца з намі сваймі кулінарнымі траўмамі: распавядаюць, да якой стравы не могуць дакрануцца і чаму. Задача нашых шэф-кухараў Вольгі Прыгаравай і Аляксандра Чыкілеўскага змяніць рэцэпт так, каб наш герой з’еў усё да апошняй лыжкі ды папрасіў яшчэ. Напрыканцы праграмы госць абірае пераможцу кулінарнай бітвы.
На гэты раз да нас завітаў Уладзімір Ушакоў, заснавальнік і мастацкі кіраўнік Сучаснага мастацкага тэатру – першага прыватнага ў Менску. Ён распавёў кранальную гісторыю пра тое, як у дзяцінстве праводзіў канікулы ў бабулі ў Гомлі і як яна старалася накарміць унукаў стравамі, прыгатаванымі з самых свежых прадуктаў з рынку.
Адной з такіх страваў былі катлеты, якія Валодзя чамусьці ненавідзеў і замест таго, каб есці, складаў у «схованку» паміж тумбай і сцяной. Ці варта распавядаць, якой была рэакцыя бабулі, якая знайшла катлетныя могілкі падчас генеральнай уборкі?
Такім чынам, што будуць гатаваць нашыя шэф-кухары, ужо зразумела. Заданне ўскладняецца тым, што ў Уладзіміра дыябет і прадуктаў з высокім глікемічным індэксам у стравах быць не павінна. Каб высветліць, якое мяса і спосаб гатавання абраць для катлет і што падаць на гарнір, Вольга Прыгарава і Аляксандр Чыкілеўскі параіліся з лекарам-дыетолагам Ірынай Яблонскай.
«Цукровы дыябет – гэта парушэнне вугляводнага абмену. Я парэкамендавала б выкарыстоўваць птушку, лепш за ўсё – грудку. Альбо прыгатуйце яму катлеты рыбныя, на пары», – прапанавала адмысловец.
Даражэйшы варыянт: філе труса. А вось некалькі ідэяў для гарніру: ліставая або агароднінная салата, гародніна на пары (за выключэннем бульбы і буракоў), пюрэ з кораня салеры.
Вольга Прыгарава вырашыла прыгатаваць трусяціну. Па яе яна накіравалася на экалагічную сядзібу Матрунчыкаў. Адтуль прывезла таксама ідэю для гарніру: печаны тапінамбур з шалфеем. Аляксандр Чыкілеўскі спыніў выбар на курыных катлетах, фаршыраваных тофу і агароднінным пюрэ на гарнір.
Катлеты з труса з печаным тапінамбурам і соусам гуакамоле
- фарш з трусяціны – 700 г
- яйка – 2 шт.
- кукурузны крухмал – 100 г
- тапінамбур – 1 кг
- лісце шалфею – 5 шт.
- цытрына – 1 шт.
- аліўкавы алей – 100 мл
- авакада – 300 г
- свежыя памідоры – 100 г
- каляндра свежая – 20 г
- чырвоная цыбуля – 100 г
- перац чылі – 1 шт.
- лайм – 2 шт.
- грануляваны часнык – 10 г
- галінкі піхты
- мікразеляніна для ўпрыгожвання
Змешваем фарш, крухмал, яйкі і спецыі. Фармуем катлеты і гатуем на пары 15–20 хвілін.
Гатуем гарнір. Тапінамбур добра прамываем вадой і наразаем не вельмі маленькімі кавалачкамі. Дадаем соль, перац, лісце шалфею, апырскваем цытрынавым сокам і аліўкавым алеем. Запякаем 30 хвілін пры тэмпературы 185 градусаў.
Для соусу гуакамоле перабіваем блэндарам да аднастайнасці: ачышчанае авакада, зялёную каляндру, сок лайму, чылі, чырвоную цыбулю, ачышчаны ад скуркі памідор і соль.
Падаем з падсмаленымі галінкамі піхты.
Курыныя катлеты з начынкай з тофу і зеляніны з агароднінным пюрэ і парэчкавы соусам
- курынае філе – 500 г
- рэпчатая цыбуля – 150 г
- часнык – 1 галоўка
- кроп – 20 г
- памідоры – 200 г
- тофу – 200 г
- базілік – 50 г
- мята – 20 г
- белы хлеб – 100 г
- морква – 150 г
- корань салеры – 200 г
- корань пастарнаку – 200 г
- чабор свежы – 20 г
- чорная парэчка – 300 г
- сланечнікавы алей – 300 г
- насенне сланечніку – 50 г
- соль
- кары
- карыца
- праванскія зёлкі
Для падрыхтоўкі фаршу курынае філе пасекчы нажом. Дробна парэзаныя цыбулю і часнык абсмажыць на ператопленым сметанковым масле. Дадаць у атрыманы фарш абсмажаныя цыбулю і часнык, карыцу, кары, праванскія зёлкі, дробна парэзаны кроп і невялікая колькасць ператопленага сметанковага масла, соль. Памідоры бланшыраваць, ачысціць ад скуркі і насення, дробна парэзаць і дадаць у фарш для сакавітасці. Добра змяшаць.
Для начыння змяшаць сыр тофу з дробна пасечанымі базілікам і мятай, дадаць дробна парэзаны часнык, змяшаць. Сфармаваць катлеты, дадаўшы ўнутр начынне.
Бляху заслаць пергаментнай паперай, вышмараваць ператопленым сметанковым маслам, пакласці часнык, галінкі чабору і мяты. Выкласці катлеты і паставіць у разагрэтую духоўку на 10-12 хвілін.
Для гарніру парэзаць корань салеры, пастарнак, моркву, лук і часнык. Абсмажыць на ператопленым сметанковым масле цягам 5 хвілін. Дадаць ваду і ўварыць да мяккасці.
Гатовую гародніну перабіць блэндарам і перацерці праз сіта для аднастайнай кансістэнцыі. Дадаць сланечнікавы алей і злёгку ўзбіць.
Для соусу-эмульсіі парэчку ўварыць, перацерці праз сіта. Узбіць блэндарам, дадаючы невялікімі порцыямі сланечнікавы алей.
Чый варыянт перамог у кулінарнай бітве? Вызначыцца з выбарам Уладзіміру дапамогуць дачка Анастасія, якая прыйшла ў студыю з мужам Сяргеем. Глядзіце новае выданне кулінарнага шоу «Я не буду гэтага есці» (відэа ў пачатку артыкула).
Шоу «Я не буду гэтага есці» глядзіце штонядзелю а 19:35 паводле менскага часу на тэлеканале «Белсат» праз спадарожнік «Astra 4A» (ранейшая назва «Sirius 4»), онлайн, на YouTube-канале «Белсат Life» або ў архіве на нашай старонцы.
Любіце гатаваць? Сачыце за абнаўленнямі на Facebook, у «Одноклассниках» і ў Instagram.
ІА, belsat.eu
