Рэальнасць аднаго селяніна: Выжыць на 20 рублёў на месяц

Спадар Юрый жыве ў Глыбоцкім раёне. Працуе ў калгасе слесарам-рамонтнікам. З прычыны маленькіх заробкаў, якія плоцяць працаўнікам сельскай гаспадаркі, ужо звальняўся. Але высокааплатнай працы ў раёне гэтак і не знайшоў, таму вярнуўся. Бруднымі яму налічваюць 330 рублёў. Пасля вылічэння падаткаў на жыццё застаецца менш за 270 рублёў.

«Бярэм самае неабходнае: хлеб, батон, алей. Трымалі гаспадарку, але потым ужо здароўе стала падводзіць, давялося адмовіцца ад гаспадаркі. Ну, ёсць куры. А так прывыклі абыходзіцца мінімумам», – кажа Юрый Сухавіла.

Спадар Юрый распавядае, што тыя, хто маладзейшы, з Глыбоччыны збягаюць бліжэй да запаветных 500 – у буйныя гарады. Працаўнікоў у калгасе не стае.

«Маленькі заробак і цяжкія ўмовы працы. Ну, хто пагодзіцца працаваць? Калі ішла пасяўная, з 7-ай гадзіны раніцы і да 9-ай гадзіны вечара працавалі!» – распавядае Юрый Сухавіла, які атрымлівае заробак 270 рублёў.

Паводле афіцыйных звестак, сярэдні заробак працаўнікоў сельскагаспадарчай галіны – 700 рублёў. На справе – шмат дзе не дацягвае да мінімалкі, то бок да 330 рублёў. Спадар Юрый распавядае, што іхны калгас «Сельцы» ў раёне на добрым рахунку. Напрыклад, нядаўна ўдалося павялічыць надоі. Але на заробак гэта ніяк не паўплывала.

«Напэўна, устаноўка ідзе з цэнтру, адтуль – з Глыбокага. Мы ў падпарадкаванні гарадскіх базаў. У іх заробкі, вядома, вышэйшыя. Хто б там за 300 рублёў працаваў? Ну, а нам дзявацца няма куды», – кажа Юрый Сухавіла.

20 рублёў за месяц і праца за харчы

Адпаведна апошнім звесткам, у Берасцейскай вобласці сярэдні заробак складае 892 рублі. У Віцебскай – 867. На Гомельшчыне – 930, Магілёўшчыне – 846, Гарадзеншчыне – 892 рублі. У Менскай вобласці сярэдні заробак дасягае 1050 рублёў. Калі ад гэтых грошай адняць суму падаткаў, якія вылічваюцца штомесяц з працаўнікоў, ужо атрымаецца менш, чым сцвярджае дзяржава. І гэта не кажучы пра тое, што афіцыйны сярэдні заробак беларусаў – вельмі завышаны, а рэальныя заробкі нашых суайчыннікаў дзяржаве агучваць нявыгадна.

«У мяне бруднымі недзе 300 рублёў заробак», – кажа Сяргей Асіпёнак.

Сяргей Асіпёнак працуе падсобным рабочым на агракомплексе, які падпарадкоўваецца смалявіцкай бройлернай птушкафабрыцы. Жыве ў вёсцы Мглё, што ў Менскай вобласці. То бок у рэгіёне, дзе афіцыйна зарабляюць больш за 1000. Але Сяргей не атрымлівае нават мінімалкі. Пры гэтым працуе з 7-ай раніцы да 7-ай вечара.

Сяргей – абавязаная асоба. Жонку накіравалі ў лячэбна-працоўны прафілакторый, а дзіця забрала дзяржава. Штомесяц за ўтрыманне сына ў яго забіраюць 70 % заробку. Напрыклад, налічылі – 307 рублёў. 25 рублёў утрымалі за прадукты, якія работнікам выдаюць у краме прадпрыемства. 13 – за харчаванне: Сяргей працуе на палях і мусіць атрымліваць абед. Праўда, кажа, што з невядомых прычынаў ежы яму не даюць. Мінус падаходны падатак, вылікі на ўтрыманне дзіцяці. І атрымліваецца, што Сяргей за месяц зарабіў 20 рублёў.

«Бывае падзарабляю, суседзі просяць тое, тое, тое. Ну, у асноўным разлічваюцца не грашыма, а харчамі: хто кавалак сала, хто закаткі, якія людзі зрабілі, а не ядуць», – распавядае Сяргей Асіпёнак.

Бываюць месяцы, калі Сяргей увогуле нічога з заробку не атрымлівае. Быў выпадак, калі пасля ўтрыманняў ён застаўся вінны прадпрыемству 50 рублёў. Звольніцца Сяргей не можа, бо ён абавязаная асоба. Пісаў у райвыканкам, прасіў, каб далі працу з большым заробкам. Але вольных вакансіяў у раёне не знайшлося.

«Заробак 500 рублёў лічыцца ў рэгіёне вельмі добрым. Таму, зыходзячы з гэтага, шмат якія маладыя людзі ды не вельмі маладыя імкнуцца трапіць у абласныя гарады і ў большай ступені ў Менск», – каментуе Ігар Комлік, прадстаўнік незалежнага прафсаюзу РЭП.

У Менску сапраўды можна знайсці працу з добрым паводле беларускіх мерак заробкам. Сярэдняя аплата на сакавік складала больш за 1500 рублёў. Аднак перабрацца ў сталіцу ўсе жыхары рэгіёнаў не змогуць. Таму ім не застаецца нічога іншага, як лічыць капейкі і думаць, як на іх выжыць.

Таксама ў праграме «Асабісты капітал»:

  • Дачнікі 40 гадоў чакаюць рамонту дарогі
  • Працуем на экспарт – і забыліся пра ўласных грамадзянаў
  • Як бізнесоўцы рыхтуюцца зарабіць на Еўрагульнях

Праграма «Асабісты капітал» цалкам:

Глядзіце праграму «Асабісты капітал» кожны панядзелак а 19:00 на тэлеканале «Белсат», а таксама онлайн на нашым сайце. Далучайцеся да нашых старонак ў FacebookдыОдноклассниках. Падпісвайцеся на нашурассылку і раз на месяц вы будзеце атрымліваць ліст з чатырма найбольш карыснымі сюжэтамі «Асабістага капіталу».

Глядзі таксама

Больш матэрыялаў

Мільён беларусаў могуць застацца без працы

Што думаюць чыноўнікі пра магчымы недахоп харчоў?

Гэты год будзе цяжкі для беларусаў

Каронавірус знішчае бізнес. Хто застанецца без працы і грошай?

Што маюць сыны Лукашэнкі дзякуючы бацьку?

Як Лукашэнка раздае землі сябрам

«Цукровых босаў» пасадзілі. Што будзе з цукрам?

Як кітайскі вірус уплывае на беларускіх спажыўцоў?