Адныя гэтага баяліся, іншыя чакалі з нецярплівасцю: Аляксандр Лукашэнка не будзе ўдзельнічаць у наступных прэзідэнцкіх выбарах! Цяпер гэта ўжо дакладна – гэтак сказала дасведчаная варажбітка.
«Я не думаю, што ён будзе выстаўляць сваю кандыдатуру. Я думаю, што ўнутры яго цяпер ідзе вялікая барацьба: рабяты, на каго я вас пакіну», – заявіла майстар трансфармацыі свядомасці Таціяна Вараб’ёва.
Рабяты ў добраахвотны сыход Лукашэнкі не вераць.
Жыхары Менску кажуць:
«Пакуль не сыдзе туды, іншага спосабу няма»».
«Я ў гэтым сумняюся. Гэта наш прэзідэнт».
«Ён сам калі адмовіцца, то знойдзе на месца годнага пераемніка».
«Тое, што кажуць варажбіты, такое адчуванне, проста падрыхтоўваюць да нечага».
А мы верым, што Лукашэнка можа больш не балатавацца, ён можа сваім указам проста АДМЯНІЦЬ выбары. Няма выбару, няма выбараў – заставайцеся з нязменным прэзідэнтам!
–-
Нязменным прэзідэнтам цягам трох дзесяцігоддзяў быў і сябар Лукашэнкі – Робэрт Мугабэ. За гэты час Зімбабвэ стала найбяднейшай краінаю свету: беспрацоўе там дасягае 90 %, а за адзін долар даюць 35 квадрыльёнаў мясцовых долараў. Мугабэ скінулі, цяпер у Менск прыехаў ягоны пераемнік Мнангагўа.
Аляксандр Лукашэнка: «Мы вельмі перажываем за вас і хацелі б, каб вы як мага хутчэй пераадолелі ўсе складанасці».
Бедныя і найбяднейшыя дамовіліся аб звышпрыбытковых праектах. У якасці бонусу для Зімбабвэ Лукашэнка паабяцаў прыехаць у Афрыку.
«Я канешне, з вялікім задавальненнем прыеду да вас у краіну».
Але ці бяспечна гэта? Афіцыйна прэзідэнта Зімбабвэ завуць Эмэрсан Мнангагўа, неафіцыйна – Кракадзіл, мянушка засталася пасля ўдзелу ў «Кракадзілавай бандзе». Што Лукашэнка можа супрацьпаставіць зубастаму партнёру? Як беларусы завуць Лукашэнку?
Жыхары Менску кажуць:
«Лук, лучок, залатая цыбулінка»
«Лысы, вусаты»
«Бацька і бацька»
«Лука, шмат кепскіх каментароў»
«Злым вусатым дзядзем»
«Лука, Лукавы хіба што»
«У мяне бацька яго называў, калі яшчэ яго не выбралі, Алкашэнка»
«Учора сказалі вусаты нянь, у краме чула»
Наступны раз запытаем у беларусаў, ці адпусцяць яны Няня да Кракадзіла. Хаця ехаць туды ёсць па што: у Зімбабвэ ёсць карысныя выкапні. А ў Менску – золатаздабывальная тэхніка – не звыштэхналагічная, каб абагаціць усіх беларусаў, але дастаткова добрая, каб азалаціць адну сям’ю ў Беларусі.
Беларусам жа… раздадуць грошы: пасля продажу зімбабвійцам аднаго трактару кожная беларуская сям’я атрымае адразу некалькі тысяч долараў… зімбабвійскіх – таннейшых за туалетную паперу.
––
Айчынныя трактары цешаць і вока беларусаў. Ці гэтак жа цешыліся б менчукі, калі б ведалі, колькі чыноўнікі за іх заплацілі. На асвятленне такіх фігураў сталічныя ўлады выдаткавалі больш за мільён долараў.
Жыхары Менску кажуць:
«Гэта вельмі шыкоўна – мільён долараў».
«Якія фігуркі, для чаго?»
«Не варта гэтага рабіць, але каму тут што дакажаш».
«Лепш пусціць гэтыя грошы на сапраўдныя сацыяльныя патрэбы, на ахову здароўя»
«Хочацца, каб было і прыгожа і танна. А мільён, канешне, шкада. Вельмі шкада. Ха-ха».
Не бяда, што новы трактар ужо іржавы ды з ізаляцыйнай стужкай — галоўнае, дарагі! Як і ўсё іншае.
Вольга Старасціна, «Белсат»