Амаль як у 1937 годзе. Ноччу ў Менску затрыманы за рэпост былы журналіст Глеб Рубанаў
У лепшых традыцыях чэкістаў з НКВД. Начное затрыманне за пост у сацыяльных сетках. Сёння на досвітку ў Менску затрыманы былы журналіст, а цяпер ІТ-кансультант Глеб Рубанаў.
Як паведамляе жонка Рубанава Анастасія, каля паловы пятай раніцы на хатні нумар патэлефанаваў участковы і папрасіў Глеба выйсці на двор, бо нехта нібы пашкодзіў іхны аўтамабіль. Машына аказалася цэлая, а самога Рубанава завезлі ў Савецкі РУУС сталіцы, дзе затрымалі да суда.
Мужчыну абвінавачваюць у «распаўсюдзе інфармацыйнай прадукцыі, якая змяшчае заклікі да экстрэмісцкай дзейнасці». ІТ-кансультанту можа пагражаць буйны штраф.
На думку жонкі, Рубанава караюць за тое, што некалькі месяцаў таму ён падтрымаў флэшмоб #яэкстрэміст, распачаты былым палітвязнем анархістам Мікалаем Дзядком. Карыстальнікі сацсетак публікавалі свае фотаздымкі з матэрыяламі з Рэспубліканскага спісу экстрэмісцкіх матэрыялаў, выступаючы супраць закону аб супрацьдзеянні экстрэмізму, які ўлады могуць выкарыстоўваць для барацьбы з іншадумцамі.
Сітуацыю скаментаваў актывіст анархісцкага руху Вячаслаў Касінераў:
«…Я думаю, што гэта ў межах таго, што ўлада паказвае, што ёсць кола людзей, некалькі людзей з апазіцыі, Севярынец, Касінераў, Дзядок, што з імі нельга салідарызавацца, нельга ні ў якіх флэшмобах удзельнічаць. Той жа Паліенка. Яны будуць, відавочна, карацца, і як толькі дзесьці нават рэпостнеце – гэта будзе падвяргацца штрафам і затрыманням. Плюс, як мы бачым, яны распачалі вельмі сур’ёзную гвалтоўную практыку: затрымліваюць, трымаюць некалькі содняў, толькі потым асуджаюць, разумеючы, што ствараць адміністрацыйнага палітвязня на 15 содняў ім не трэба…»
