Адзін – за мяжой, другі – на «хіміі». Як склаўся лёс герояў праграмы «Шчыра кажучы»
Вядоўца праграмы «Шчыра кажучы» Арына Маліноўская ў апошнім выданні 2021 года размаўляе з героямі праграмы, якія прыходзілі ў студыю цягам года, каб даведацца, як змянілася іхнае жыццё.
Сёлета ажно два выданні аўтары «Шчыра кажучы» прысвяцілі працы беларускіх сілавікоў.
Ягора Емяльянава, былога супрацоўніка органаў, пасля эфіру затрымалі. Былы сілавік, які звольніўся падчас пратэстаў і ўладкаваўся фітнес-трэнерам, паўтара месяца правёў на Акрэсціна, а потым даведаўся, што супраць яго распачалі крымінальную справу паводле арт. 425 ч. 2: «Бяздзейнасць службовай асобы, наўмыснае невыкананне службовых абавязкаў насуперак інтарэсам службы».
«Менавіта гэтая праграма і была прычынаю затрымання, – распавядае Ягор Емяльянаў. – …Яны мне так і сказалі прамым тэкстам, што ты шмат гаворыш не там, дзе трэба».
Ягор быў вымушаны бегчы з Беларусі – ён нелегальна перайшоў мяжу з Украінаю. На гэтым прыгоды не скончыліся: у Кіеве ўцекача затрымалі, а потым завезлі на допыт у СБУ. Але разабраўшыся ў сітуацыі, адпусцілі. Ягор дачакаўся сваю сям’ю і разам з ёй эміграваў у Нямеччыну, дзе намагаецца ўладкаваць сваё жыццё.
Яшчэ адзін герой выдання «Шчыра кажучы» – былы начальнік аддзелу крымінальнага вышуку Дзмітрый Кулакоўскі. Пасля выбараў пастанавіў звольніцца, але неўзабаве на яго завялі крымінальную справу паводле арт. 362: «Абраза прадстаўніка ўлады». Былы сілавік быў вызвалены ў зале суда да апеляцыі, тады і даў інтэрв’ю нашай праграме. Але на наступны ж дзень пасля выхаду ў эфір выдання мужчыну затрымалі і адправілі на Акрэсціна, дзе ён прабыў да суда. Кулакоўскаму прысудзілі 2 гады «хіміі», цяпер яго трымаюць у папраўчай установе адкрытага тыпу на Пружаншчыне.
Таксама ў праграме кіраўнік Беларускага расследавальніцкага цэнтру Станіслаў Івашкевіч распавядзе, як ягоная каманда была вымушаная рэлакавацца ў Польшчу. Былыя госці праграмы – беларускі хакер Сяргей Паўловіч, які адбываў пакаранне за кіберзлачынства, сужэнцы Настасся і Сяргей Крупенічы, якіх абвінавацілі ў распаўсюдзе экстрэмісцкіх матэрыялаў, былы азотавец Аляксей Сідар, які далучыўся да страйку, – распавядуць пра свае ўцёкі з Беларусі і тое, як намагаюцца знайсці сябе за мяжою. Лідар гурта «Галасы ЗМеста» апавядзе пра складанасці жыцця праўладных артыстаў. На заканчэнне – аптымістычны прагноз на 2022 год ад былога дыпламата Паўла Мацукевіча.
Праграма «Шчыра кажучы» выходзіць штосераду а 19:05 у эфіры «Белсату», а таксама на нашым канале YouTube-канале.
Калаж з фота: асабісты архіў Егора Емяльянава; Дар’я Буракіна; Getty Images / FAP / S. Gapon, president.gov.by
