Захад здаў назад і пятага пакету санкцыяў не будзе? Што будзе далей рабіць Лукашэнка: яшчэ больш ціснуць на Еўразвяз – ці спыняць крызіс? Як адбываецца «паўзучая армянізацыя» Беларусі? Ці рыхтуе Расея чаргую ваенную агрэсію ў Еўропе з плацдармам у Беларусі?
На гэтыя ды іншыя пытанні адказвалі ўдзельнікі чарговага выдання праграмы Змітра Міцкевіча «Без акрэдытацыі»: журналістка-фрылансерка Вольга Быкоўская, сацыёлаг, эксперт у камунікацыях Дзмітрый Грамакоў, а таксама журналіст «Белсату» Яраслаў Сцешык.
Некаторыя тэзы, выказаныя гасцямі ў часе выдання:
Дзмітрый Грамакоў
- Беларусь у Еўразвязе не разглядаецца як самастойны субʼект – рэжым Лукашэнкі разглядаецца як акупацыйная адміністрацыя.
- Крэмль не гатовы браць на сябе адказнасць за крызіс на мяжы, атрымліваць за гэта санкцыі.
- Трэба настойваць на другасных санкцыях – супраць расейскіх кампаніяў, якія супрацоўнічаюць са спонсарамі рэжыму Лукашэнкі.
Вольга Быкоўская
- «Калектыўны Захад» – гэта сімулякр, які прыдумала расейская прапаганда.
- Калі мігранты застануцца ў Беларусі, гэта будзе бомба запаволенага дзеяння.
- Калі ты хочаш паразумецца з суседам, ты не будзеш падпальваць яму плот.
Яраслаў Сцешык
- Падвышэнне ставак Лукашэнкам звярнула ўвагу сусветных актараў да Беларусі.
- Калі Пуцін ужо мяняўся ролямі з Мядзведзевым, з прэзідэнта на прэмʼера, дык чаму не памяняцца і з Лукашэнкам?
- Лукашэнка можа пачаць ціснуць на Захад і праз іншыя схемы: наркатрафік або кантрабанду радыеактыўных матэрыялаў.
Поўную версію дыскусіі глядзіце ў праграме «Без акрэдытацыі».
Калаж з фота: Sergei Bobylev, TASS, Forum / Maxim Guchek/BELTA, TASS, Forum
