Тэмы праграмы:
Ці нападзе Расея на Украіну другі раз, разам з Лукашэнкам? Што можа стрымаць кіраўніка Беларусі? Высокапастаўлены чыноўнік NATO на сустрэчы міністраў абароны Альянсу заявіў неафіцыйна, што Лукашэнка разумее, што санкцыі за агрэсію супраць Украіны могуць увесці і супраць яго. У сустрэчы з ім удзельнічаў журналіст «Белсату» Сяргей Пеляса. Прадстаўнік кіраўніцтва Паўночнаатлантычнага альянсу дадаў, што ясных знакаў падрыхтоўкі Беларусі да ваеннай інтэрвенцыі ва Украіне не відаць. Дык ці зацягне Крэмль Лукашэнку ў наземныя аперацыі ва Украіне? Каментуюць Яўген Магда і Валер Карбалевіч. Больш падрабязна – у рэпартажы Вольгі Міцкевіч.
Пуцін не пратрымаецца да канца наступнага года, і трэба пачынаць размаўляць моваю перамогі. Так лічыць генерал-лейтэнант у адстаўцы Бэн Годжэз, былы камандуючы арміяй ЗША у Еўропе. У інтэрв’ю Сяргея Пелясы з амерыканскім вайскоўцам: чатыры вялікія памылкі, якія зрабіў Крэмль у планаванні вайны супраць Украіны, а таксама пра тое, якую ролю адыгрывае Лукашэнка ў канфлікце, і паводле якіх сцэнароў будзе разгортвацца вайна.
Збройныя сілы Украіны атрымаюць тэхніку, неабходную для контрнаступу і абароны паветранай прасторы краіны. Пра гэта заявіў кіраўнік Пэнтагону Лойд Остын пасля сустрэчы «Рамштайн-6», якая прайшла напярэдадні ў Бруселі. Ці дастаткова абяцанага ўзбраення для змагання з расейскай агрэсіяй? Матэрыял Юліі Лабанавай.
Вынікі спаткання міністраў абароны NATO і Кантактнай групы для абароны Украіны ў каментары Сяргея Пелясы са штаб-кватэры Паўночнаатлантычнага альянсу ў Бруселі.
Пуцін едзе ў Казахстан, дзе сустракаецца з Эрдаганам. NATO рыхтуецца да найгоршых сцэнароў развіцця падзеяў і заяўляе аб сваёй непахіснасці ў барацьбе з імперскімі амбіцыямі Расеі. Наколькі моцныя захопніцкія памкненні Пуціна, да чаго яны могуць прывесці? Ці магчымая поўная ізаляцыя альбо наадварот – дэмакратызацыя Расеі? Каментуюць Уладзімір Мілоў і Уладзімір Фясенка. Адказы шукала Надзея Бельская.