Новых еўрапейскіх санкцыяў рэжым Беларусі можа не чакаць прынамсі да чэрвеня – у Бруселі кажуць, што не паспелі падрыхтаваць фармальных пытанняў. Веры ў тое, што міжнародны ціск прымусіць Лукашэнку сесці за стол перамоваў да чэрвеня, як спадзяецца каманда Святланы Ціханоўскай, – усё менш. Магчыма, размаўляць давядзецца з… Расеяй. І менавіта праз санкцыі. Амерыканскія. Падрабязней – у сюжэце Усевалада Шлыкава.
«Беларускі снайпер» – гэта палітычны трылер, які з’явіўся ў кнігарнях Польшчы. Яе героі рызыкуюць уласнымі жыццямі, каб зрынуць рэжым Лукашэнкі. Галоўны герой – Алег Прыбылоўскі, верны прэтарыянец кіраўніка Беларусі, апынуўся перад не простым для яго выбарам. Ён пастанаўляе бараніць сваё вялікае каханне і захаваць пачуццё ўласнае годнасці. Інтэрв’ю з Лешэкам Шэрэпкам, пісьменнікам, доктарам гістарычных навук, амбасадарам Польшчы ў Беларусі ў 2011–2015 гадах.
9 траўня можа займець у Беларусі новае значэнне. Беларусы збіраюцца на масавы пратэст у Дзень перамогі, а Лукашэнка тым часам не можа вызначыцца, ці ехаць яму на парад у Маскву. Раней у Горадні ўжо забаранілі паказ антыфашысцкага спектаклю. Ці пойдзе Лукашэнка далей і ўчыніць карную аперацыю супраць народу ў Дзень перамогі над нацызмам? Ці станецца 9 траўня гэтак званым днём Х, ці варта наагул спадзявацца на аднамомантавае падзенне рэжыму ды рыхтавацца да гэтага? Ведае Зміцер Міцкевіч.
Абаронная выведка ЗША апублікавала аналіз ацэнкі пагрозаў. Апроч асноўнага суперніка – Кітаю – у ім часта фігуруе Расея. Пытанне бяспекі гучала і на парадку дня сустрэчы міністраў «Вялікай сямёркі». Як бачаць патэнцыйную пагрозу Кітаю ды Расеі на Захадзе? Ды якім процідзеяннем могуць адказаць супернікам? Высвятляла Юлія Лабанава.
Міжнародны тэлечасопіс «ПраСвет» з Алінаю Коўшык ды Сяргеем Пелясою глядзіце шточацвер а 21:35. Падпісвайцеся на «Прасвет» у профілях у Facebook і «Аднакласніках»! Глядзіце нас праз спадарожнік «Астра 4A» (ранейшая назва «Sirius 4»), онлайн, на YouTube-канале і на нашай старонцы.
Фота вокладкі: president.gov.by