Беларускія акторы павіншавалі беларусак з надыходам вясны.
Адмыслова да Міжнароднага жаночага дня былыя акторы Купалаўскага тэатру прачыталі верш «Выйдзі», напісаны Янкам Купалам у 1912 годзе.
Паэт звяртаўся ў творы да персаніфікаванага вобразу Айчыны:
Устань ты, старонка, родная маці!
Годзе зімовага рабскага сну,
Годзе табе ўжо слёзна ўздыхаці, –
Выйдзі на поле, на сенажаці,
Выйдзі спаткаці вясну!
Вобраз вясны ў паэзіі Купалы – гэта сімвал вызвалення і адраджэння, веры і надзеі. Пясняр быў перакананы, што Беларусь дачакаецца шчаслівай і вольнай будучыні. Каб спадзяванні паэта спраўдзіліся, шмат высілкаў і намаганняў прыклалі менавіта беларускія жанчыны.
Былыя акторы Нацыянальнага тэатру імя Янкі Купалы, звольненыя ўладамі за сваю грамадзянскую пазіцыю, у эфіры нашага тэлеканалу па-новаму пераасэнсоўваюць паэтычную класіку ў праекце «Вершы».