12 чэрвеня ў Віцебскім абласным судзе суддзя Святлана Іванова разглядала касацыйныя скаргі журналісткі Алены Шабуні і відэааператара Вячаслава Лазарава. Яна пакінула ў моцы прысуд суддзі Наваполацкага суду Зінаіды Балаболавай.
15 траўня нашых аўтараў абвінавацілі ў парушэнні заканадаўства аб сродках масавай інфармацыі і пастанавілі спагнаць з кожнага па Br 637,5.
Нагодаю для справы стаў відэасюжэт пра аварыю на «Паліміры», якая здарылася ў 2016 годзе. Сам сюжэт выйшаў сёлета ў праграме «Кожны з нас» 22 сакавіка.
У ім распавядалася пра апаратчыка Андрэя Швілпо, які ўратаваў жыццё сваё і многіх калег падчас пажару. Аднак кіраўніцтва прадпрыемства палічыла працаўніка вінаватым ды падала на яго ў суд. Летась суд пастанавіў спагнаць з Андрэя матэрыяльныя страты, а гэта для мужчыны непад’ёмны цяжар.
Андрэй Швілпо і іншыя работнікі «Паліміра» былі сведкамі ў судзе над журналістамі. Мужчынаў абурыла, што рэпартэраў судзяць і штрафуюць за паказаную праўду.
Пры падрыхтоўкі адміністрацыйнай справы ў суд Вячаслава Лазарава нават не апыталі пратаколаў аб правапарушэнні ўдзельнікам адміністрацыйнай справы не прадставілі, а пра разгляд справы паведамілі менш чым за двое сутак.
Падрыхтавацца да сваёй абароны ў абвінавачаных не было магчымасці.
Шабуню і Лазарава ўжо другі раз судзяць за матэрыялы для «Белсату». Першы раз іх прызналі вінаватымі ў «незаконным вырабе і распаўсюдзе прадукцыі СМІ» ў сакавіку 2018 года. Тады суддзя Віцебскага райсуда Міхаіл Зубеня пастанавіў аштрафаваць Алену Шабуня на 20 базавых велічынь, а Вячаслава Лазарава на 22 базавыя велічыні. Пастанову раённага суда журналісты спрабавалі абскардзіць у Віцебскі абласны суд, але суддзя Святлана Іванова адхіліла касацыйныя скаргі журналістаў.
Журналісты не згодныя з абвінавачваннем і будуць абскарджваць прысуд у вышэйшых інстанцыях.
Павел Левінаў, праваабаронца Беларускага Хельсінкскага камітэту, заявіў, што суд ігнаруе міжнароднае права і міжнародные абавязкі Беларусі.
«Ніводнага доваду скаргі не зняпраўдзілі але людзей, тым не менш, прыцягнулі да адміністрацыйнай адказнасці – за тое, што яны рэалізоўвалі свае правы», – заявіў Левінаў.
Левінаў звяртае ўвагу, што журналістаў абвінавацілі ў «вырабе і распаўсюдзе прадукцыі сродкаў масавай інфармацыі», але распаўсюд адбываўся з-за мяжы (рэдакцыя «Белсату» знаходзіцца ў Польшчы). Аднак у час «распаўсюду» журналісты не пакідалі тэрыторыю Беларусі.
«Пастанова суддзі Івановай не толькі супярэчыць міжнародным стандартам, а і здароваму сэнсу», – дадае адвакат.
Журналісты звярнуліся ў камітэт ААН па правах чалавека, іх скаргі чакаюць свайго разгляду.
Крысціна Авакумава, belsat.eu