Сачыце за намі, каб не прапусціць самае важнае.
24:00 Прыкладна апоўначы пачалі адпускаць людзей з РАУСа Маскоўскага раёну. Паводле аднаго з тых, каго адпусцілі, Паўла, у актавым зале РАУСа засталося каля 20 чалавек, сярод якіх толькі адна дзяўчына, астатнія мужчыны.
21:00 Па ўсім цэнтры гораду стаяць аўтазакі, ходзіць амап і супрацоўнікі міліцыі ў цывільным. Людзей, якія б бралі ўдзел у мірных пікетах, няма. Пасля разгону чаргі ніхто ў мірныя пікеты так і не сабраўся.
20:45 Вызвалілі затрыманых журналістаў Антона Трафімовіча і Віялету Саўчыц. Антону пры затрыманні пабілі нос.
«Людзі ў цывільным выскачылі з мікрааўтобуса. Не прадстаўляючыся, закруцілі жорстка. І ў нейкі момант пры затрыманні па носе вельмі моцна стукнулі – і ўсё было ў крыві ў мікрааўтобусе», – распавёў Антон Трафімовіч абставіны затрымання ў каментары belsat.eu.
20:40 АМАП забараняе замежнікаў фатаграфаваць сябе.
«Да нас падышла дзяўчына і сказала што за ёй ідзе АМАП, бо яна іх сфатаграфавала і спытала ў нас, што ёй рабіць. Адразу падышлі два супрацоўніка і папрасілі яе адысці ад нас на размову. Мы настойвалі на тым, каб яна засталася. АМАП казаў, што толькі грамадзяне Беларусі могуць фатаграфаваць супрацоўнікаў на службе. Пасля пару хвілін размовы ад яе адсталі», – паведамляюць карэспандэнты «Белсату».
20:25 Каля дому на праспекце Незалежнасці 11 затрыманы хлопец Руслан Рабкавец, які спыніўся на святлафоры. Яго затаўкалі ў сіні бус 9322 АС. На ім была байка з выявай аўтазаку.
20:20 На плошчы Якуба Коласа перакрылі метро.
Каля кожнага ўваходу ў метро стаяць сілавікі ў цывільным і амапаўцы.
На плошчы стаяць аўтазакі і міліцэйскія машыны.
20:00 Праваабарончы цэнтр «Вясна» паведамляе пра затрыманне больш як 20-і чалавек у Менску і Барысаве.
19:35 Зачысціўшы плошчу Незалежнасці, амапаўцы сышлі.
19:30 АМАП выціскае людзей з плошчы Незалежнасці ў пераход.
19:27 Жорстка затрымалі журналістаў радыё «Свабода» Антона Трафімовіча і Віялету Саўчыц. Міліцэйскі мікрааўтобус ехаў наўпрост за ім, пасля з яго выйшлі каля пяці чалавек і затрымалі журналістаў.
19:25 Амапаўцы падыходзяць да людзей, якія стаяць каля Галоўпаштамту.
Сам Галоўпаштамт зачынены.
19:20 Каля гатэлю «Менск» затрымалі хлопца з роварам, які запытаў у амапаўцаў, як праехаць на вуліцу Багдановіча. За ЦВК дзясятак затрыманых.
Аўтамабілі, якія праязджаюць па праспекце Незалежнасці, сігналяць у падтрыманне. Праспект перакрываюць да скрыжавання з вуліцай Сурганава.
19:10 У наўпроставым эфіры спрабавалі затрымаць журналістаў радыё «Свабода». Але яны паказалі свае пасведчанні і іх адпусцілі. Пачаліся затрыманні.
Штаб Віктара Бабарыкі будзе абскарджваць нерэгістрацыю яго кандыдатам на прэзідэнцтва. Таму ініцыятыўная група заклікае ўсіх ахвотных таксама падаць скаргу ў ЦВК.
«Гэта вашае законнае права выразіць пратэст і законны спосаб гэта зрабіць. Мы ўсе абавязаныя паказаць сістэме, што мы нязгодныя. Паказваць упарта, робячы канкрэтныя дзеянні. У скарзе мы патрабуем адмяніць рашэнне ЦВК і зарэгістраваць Віктара Бабарыку і Валерыя Цапкалу, вызваліць палітычных зняволеных», – гаворыцца ў паведамленні штабу.
19:07. Ля Галоўпаштамту стаіць кардон АМАПу і не прапускае людзей. Прайсці дазваляюць толькі тым, хто жыве ў суседніх дамах. Перакрыты таксама ўваход у падземны пераход на праспекце Незалежнасці.
18:50. Ля тэатру музкамедыi чарга сканчаецца, тут стаяць аўтазакі. Праваахоўнікі праз гукаўзмацняльную апаратуру папярэдзілі, што ў сувязі са сканчэннем працы ЦВК яны просяць разысціся. Некаторыя ўдзельнікі чаргі прапаноўваюць усім рухацца да Галоўпаштамту, каб адтуль накіраваць пісьмовыя заявы ў ЦВК.
18:10. Чарга расцягнулася больш чым на кіламетр. ЦВК заявіў, што ў 18:50 спыніць працу і далей скаргі трэба будзе дасылаць па пошце. Але людзі працягваюць стаяць.
18:00. Невядомая жанчына, якая праходзіла міма, пачала вельмі эмацыйна абурацца тым, што людзі стаяць у чарзе. Сказала, што будзе галасаваць за Лукашэнку і заявіла, што ў людзей на плошчы няма сумлення.
https://www.facebook.com/BELSAT.TV/videos/1468049710072134/?v=1468049710072134
17:30. Хлопцы ў чарзе раздаюць бананы і цукерачкі. «Мы проста падумалі, што людзі, якія тут стаяць, хочуць ужо есці. Вось мы і вырашылі дапамагчы», – кажуць яны.
17:20. Каардынатарка штабу Бабарыкі Марыя Калеснікава таксама прыходзіла ў ЦВК і падала скаргу (людзі прапусцілі яе без чаргі), аднак заставацца на плошчы Незалежнасці не стала і адразу сышла.
Тым часам у чарзе стаяць каля тысячы чалавек. Некалькі маладзёнаў паставілі крэслы ў чарзе: яны цяпер сядзяць і працуюць у сваіх ноўтбуках, не пакідаючы плошчу.
16:45 Хлопец прынёс з сабой Канстытуцыю, па якой паступаў ва Універсітэт.
16:30 Ля ЦВК сабраліся сотні людзей. Яны стаяць у чарзе, каб падаць скаргу ў ЦВК.
А 16:30 «Белсат» ладзіць стрым з-пад ЦВК. Сачыце за нашымі сацсеткамі, YouTube і тэлеэфірам.
КТ belsat.eu