У Маскве пасля ананімнага званку пра пагрозу выбуху эвакуявалі офісны будынак на Патапаўскім завулку.Там знаходзіцца рэдакцыя «Новай газеты».
Прэс-сакратар выдання Надзея Прусянкова распавяла, што аб эвакуацыі абвясцілі ўладальнікі будынку.
Крыніца агенцтва «Інтэрфакс» паведаміў, што з будынка вывелі каля 500 чалавек.
У дзясятках гарадоў Расеі з 10 верасня працягваюцца масавыя эвакуацыі людзей з гандлёвых цэнтраў, універсітэтаў, адміністрацыйных будынкаў і кінатэатраў у сувязі з ананімнымі званкамі пра нібыта закладзеныя бомбы. Ніводнага выбуховага прыстасавання знойдзена не было.
МНС абʼявіла, што масавыя эвакуацыі не звязаныя з вучэннямі. ФСБ, па інфармацыі газеты «Ведамасці», распарадзілася не даваць афіцыйных каментароў аб прычынах эвакуацыі.
16 верасня «Інтэрфакс» паведаміў са спасылкай на неназваную крыніцу, што на дачыненне да ананімных званкоў правяраюць 27-гадовага жыхара Стаўрапольскага краю. Ягоны знаёмы распавёў, што падазраваны пасля заканчэння вучобы ў тэхнікуме зʼехаў у Сірыю.
КА, belsat.eu, паводле meduza.io
