21-гадовую дзеўчыну, студэнтку з Таджыкістану, шпіталізавалі 21 красавіка з сімптомамі ВРВІ – распавяла на ўмовах ананімнасці выкладчыца медычнага каледжу. Дыягназ «пнеўманія», а сярод аналізаў – станоўчы тэст на каронавірус.
У шпіталі студэнтка 2-га курсу медкаледжу была падлучаная да апарату штучнай вентыляцыі лёгкіх (ШВЛ). Але хваробу пераадолець не ўдалося. Пахаванне дзяўчыны адбылося 5 траўня на могілках ля в. Стукачоўка.
Дырэктарка гомельскага медычнага каледжу знаходзіцца ў адпачынку. Ларыса Кавалеўская, якая выконвае абавязкі дырэктаркі, не адказала «Белсату» пытанне, якія прафілактычныя захады прыняла адміністрацыя каледжу ў сувязі хваробаю і сконам студэнткі:
«Без каментароў, прабачайце» і кінула слухаўку. Іншыя прадстаўнікі адміністрацыі таксама адмовіліся каментаваць сітуацыю.
На вахце інтэрнату медкаледжу па вул. Рэчыцкі праспект 119, дзе жыла студэнтка, паведамілі, што блок, дзе жывуць замежныя студэнты, апрацавала санстанцыя, а самыя навучэнцы знаходзяцца на каранціне. Асоба, якая выконвае абавязкі каменданта гэтага інтэрнату, пра захады бяспекі маўчыць:
«Патэлефануйце намесніцы дырэктара медкаледжу, вам усё там патлумачаць«.
Па суседстве з будынкам інтэрнату медкаледжу знаходзіцца інтэрнат для студэнтаў-медыкаў з Шры-Ланкі, Індыі і Нігерыі. Камендантка Марыя Жабінец распавяла, што замежнікі пасля кансультацыі з прадстаўнікамі сваіх амбасадаў прынялі рашэнне застацца на каранціне:
«Мы апрацоўваем дэзрастворамі і ручкі дзвярэй, і падлогу. У нас усё нармалёва. Ходзяць у краму паводле спісу раз на тры дні. Яны ідуць па харчы ў масках і пальчатках. У нас «Гіппа» праз дарогу. Яны ў нас па вуліцы не цягаюцца. Вучацца ў інтэрнаце».
«Яна была з небагатай сям’і, – распавядае выкладчыца медкаледжу са спасылкай на брата памерлай студэнткі. – Усёй вёскай збіралі грошы ёй на вучобу – думалі, у іх будзе свой фельдшар. Сумна канешне сканаць на чужыне і застацца тут. Бедныя бацькі».
Ганна Кавальчук Belsat.eu
