«Не хочам, каб дайшло да таго, што адбываецца ў Іспаніі ды Італіі, дзе пачынаецца падзел хворых на тых, каго варта лячыць, а каго ўжо не. Мусім усё зрабіць, каб пазбегчы найгоршага сцэнару», – аргументаваў прэм’ер-міністр Польшчы Матэўш Маравецкі перад увядзеннем дадатковых захадаў грамадскай бяспекі дзеля нераспаўсюду каронавірусу.
«З кожным непатрэбным выхадам з дому пандэмія расцягваецца ў часе. Мы сутыкаемся з праблемамі, з якімі не сутыкаліся нашыя папярэднікі», – прамовіў прэм’ер-міністр Маравецкі. Таму ўлады просяць усіх жыхароў устрымацца ад выняткаў і больш жорстка выконваць дзейныя правілы бяспекі і ўводзяць чарговыя:
– няпоўнагадовыя могуць выходзіць на вуліцу толькі з дарослымі;
– дыстанцыя ад іншай асобы мае складаць 2 метры;
– з 10:00 да 12:00 крамы і аптэкі будуць адкрытыя толькі для асобаў старэйшых за 60 гадоў;
– унутры крамы адначасова могуць прыбываць 3 асобы на адну касу, на пошце – максімальна 2 асобы ля акенца;
– рабіць закупы можна толькі ў пальчатках;
– у крамах абавязковая дэзынфекцыя абсталявання пасля кожнага кліента (напрыклад, кнопак для ПІН-коду);
– усе хто жыве ў адным памяшканні разам з ізаляваным, маюць таксама заставацца на каранціне 2 тыдні;
– закрываюцца гатэлі і месцы начлегу (апроч установаў для ізаляцыі на каранцін і для размяшчэння працаўнікоў);
– у міжгародніх і гарадскіх аўтобусах занятаю можа быць максімум палова сядзячых месцаў;
– усе медычныя захады, не неабходныя для ратавання жыцця, робяцца другаснымі;
– грамадскія ровары і самакаты ўжываць нельга;
– зачыняюцца касметалагічныя салоны і цырульні, у выходныя не працуюць будаўнічыя крамы.
Цёплая вясновая субота 28 сакавіка паказала, што шмат людзей парушалі залатое правіла «застаньцеся ўдома». Хоць (кажучы пра цэнтральныя сталічныя вуліцы) нельга цвердзіць, што палякі масава выйшлі на шпацыр. У Варшаве людзі намагаліся не выходзіць групамі, больш за дазволеныя 2 асобы.
Матэўш Маравецкі згадаў таксама пра магчымыя эканамічныя наступствы каронавірусу агулам для ўсяго свету:
«Некаторыя адмыслоўцы гавораць, што гэта будзе крызіс цяжэйшы за «вялікую дэпрэсію» [эканамінчы крызіс 1929-1933 гг, – заўвага «Белсату»]. Эксперты гавораць, што беспрацоўе ў ЗША можа перавысіць 30 %».
Cтан эпідэміялагічнай пагрозы ў Польшчы абвесцілі 13 сакавіка. На той момант у краіне налічвалася 64 пацверджаныя выпадкі заражэння COVID-19, адна асоба памерла. Урад абмежаваў дзейнасць гандлёвых цэнтраў, забараніў абслугоўванне на месцы ва ўсіх гастранамічных установах. Апоўначы 15 сакавіка Польшча прыпыніла міжнародныя чыгуначныя і авіязлучэнні, закрыла свае межы для ўсіх, проч сваіх грамадзянаў і некаторых катэгорыяў замежнікаў. Кожны, хто перасякае мяжу, мае абавязак самаізалявацца на 14-дзённы хатні каранцін, за парушэнне якога на пачатку прадугледжваўся штраф да PLN 5000 ($ 1200).
Ужо 24 сакавіка Урад абвесціў стан эпідэміі, які маецца трываць да 11 красавіка. Да ранейшых абмежаванняў дадаліся забарона на перасоўванні на вуліцы без важнай прычыны (даезд да працы, выхад у краму ці аптэку, выгул сабакі, валанцёрства ў змаганні з COVID-19), абмежаванне колькасці пасажыраў у грамадскім транспарце да паловы сядзячых месцаў у салоне. Таксама Урад забараніў збірацца больш за 2 чалавекі, за выняткам родзічаў, а ў Імшах дазволілі браць удзел максімальна пяці вернікам. Максімальны штраф за парушэнне каранціну павысілі да PLN 30 000 ($ 7 300). Станам на 31 сакавіка ў Польшчы налічылі 2132 выпадкі заражэння COVID-19, з якіх 7 пацыентаў выздаравелі, 31 – памёр.
Вітаўт Сіўчык, Belsat.eu