Адвакат блогера распавёў TUT.by, чаму яму працягваюць тэрмін знаходжання ў карцары СІЗА.
Стала вядома, чаму Сяргею Ціханоўскаму працягнулі тэрмін перабывання ў карцары. Як паведаміў ягоны адвакат Віктар Мацкевіч, у блогера знайшлі павуцінне пад столлю. Гэта і стала прычынай для пакарання.
На 22 чэрвеня Ціханоўскі знаходзіцца ў карцары ўжо 10 дзён. Да яго ўжылі два спагнання 7 дзён карцару кожнае. Першае – за парушэнне рэжыму, другое – за кепскую прыборку.
Адвакат паведаміў, што Сяргей трымаецца, але наракае на ўмовы ўтрымання.
«У карцары няма пітной вады, толькі з-пад крану і не вельмі чыстая. Карцар – маленькае памяшканне, без вакна, яно не праветрываецца, круглы дзён гарыць яркае святло, вільготна ў памяшканні – працякае труба, бетонная падлога амаль пастаянна мокрая. Нармальна сядзець няма на чым, а ложак адкідваюць толькі з 22 да 6 раніцы. Таму ён шмат стаіць або робіць невялічкія крокі па карцары. Аднак у яго баліць нага, якую ён пашкодзіў яшчэ да затрымання. Таму стаяць або хадзіць яму складана», – зазначае адвакат.
Сяргей Ціханоўскі падаў скаргу на сваё ўтрыманне ў карцары ў суд Маскоўскага раёну, у пракуратуру гораду і Упраўленне дэпартаменту аб выкананні пакаранняў па Менску і Менскай вобласці. Адвакат блогера падаў скаргу начальніку СІЗА на ўмовы ўтрымання, а ў пракуратуры прасіў разгледзець усе скаргі.
КТ belsat.eu