Засталася толькі пятка. Затрыманыя распавядаюць пра траўмы і бесчалавечнасць сілавікоў. Фота 18+

За час мірных пратэстаў супраць фальсіфікацыі выбараў у Беларусі, паводле звестак МУС, затрымалі каля 7000 асобаў. «Белсат» працягвае запісваць сведчанні людзей, якія пацярпелі ад рук сілавікоў. Асцярожна: жахлівыя здымкі.

Засталася толькі пятка

Георгій, Менск

32-гадовага Георгія затрымалі 10 жніўня за 200 метраў ад дому. Побач з мужчынам разарваўся снарад. Яго аглушыла і адняло нагу.

«Мне памаглі дайсці да таксоўкі выпадковыя мінакі. Я даехаў да станцыі хуткай. Бачыў, што мезенец і другі палец боўтаюцца. Усё было як у тумане. Яшчэ спадзяваўся, што абыдзецца толькі ампутацыяй дзвюх пальцаў, але цяпер стапы няма да пяткі».

Георгію ампутавалі нагу да пяткі. Фота суразмоўцы

Цяпер Георгій ляжыць у апёкавым аддзяленні Менскай лякарні хуткай медычнай дапамогі. Тут ён будзе яшчэ месяц. Мужчына напісаў заяву ў Следчы камітэт. Днямі да яго прыходзіў следчы. Заяву прынялі, але таксама вынялі правяраць тэлефон. Калі чакаць адказу з ведамства, Георгій не ведае.

Згвалтаванні гумавымі дубінкамі, збіццё і абразы. Што адбывалася з затрыманымі падчас мірных пікетаў?

«Праз цябе я не бачу сям’ю другі дзень»

Сяргей, Менск

12 жніўня жыхар Менску Сяргей хацеў паглядзець на акцыю, але не паспеў, трапіў пад хапун у Зялёным лузе.

«АМАПаўцы былі азвярэлыя. Схапілі мяне на вуліцы, кінулі на пол у бусіку, разбілі нос нагой. Пасля селі і паставілі на нас ногі. Адзін з іх паставіў нагу на галаву і кажа: куды, сука, глядзіш – і пачалі біць. Кроў трапіла аднаму на бронікамізэльку. Ён пачаў крычаць: ты, сука, бронік мне заліў. Зняў яе і далей збіваў. Пазней перагрузілі ў вялікі аўтазак, дзе ставілі пасярэдзіне на карачкі.

Крычалі: «Што табе, сука, не падабаецца. Праз цябе я не бачу сям’ю другі дзень».

У аднаго хлопца знайшлі камень у кішэні і пачалі біць. Знайшлі бутэльку з саляркай, азвярэлі і пачалі нюхаць рукі кожнага і біць. Паветра не хапала, пада мной ляжаў чалавек. Глядзелі мабільны кожнага, шукалі канкрэтныя праграмы, тэлеграм. Усе адразу называлі свае паролі, бо пачыналі зверскі збіваць. Калі прыходзіў камандзір і гаварыў спыніцца, то яны пераставалі».

Сінякі ад збіцця АМАПаўцаў. Фота суразмоўцы

У Сяргея страсенне, паламаны нос, дваццаць шэсць гематомаў на целе. Прызнаецца: ногі настолькі збітыя, што ледзь ходзіць.

«Раўлі ўсе – і дарослыя і дзеці. Цяжарную збівалі таксама». 14-гадовы хлопец распавёў пра катаванні

«Папраломліваць бы вам галовы»

Святлана, Менск

Доктарка-анколаг Святлана не мела намеру браць удзел у пратэстах 9 жніўня. Аднак у той вечар яны паехалі ў горад.

«Мы ўжо вярталіся дадому, з сяброўкай засталіся ў аўце, прыпаркаваным на вуліцы Калініна, чакалі яшчэ дзвюх дзеўчын. Гэта не быў эпіцэнтр падзеяў. Да нас пад’язджае аўтамабіль ДАІ і адразу патрабуюць пашпарты. Мы не супраціўляліся, яны сфатаграфавалі іх, кудысьці перадаслалі. Нас нібыта адпусцілі, але падышлі нашыя знаёмыя. Мы сказалі, што лепш ім не садзіцца ў аўта. Усе сышлі, акрамя нас і яшчэ адной дзеўчыны. Гэта пабачылі працаўнікі ДАІ. Яны да нас падскочылі, вырвалі тэлефоны, пачалі пагражаць. Знянацку зʼявіўся аўтазак, нас адвезлі ў Савецкі РАУС. Да моманту вобшуку ўсё праходзіла больш-менш карэктна.

Ва ўнутраным двары было 60 чалавек. Паставілі ўздоўж сцен, тварам да сцяны, рукі на сцяне. Гэтак нас пратрымалі 12 гадзінаў. Прыехалі аўтазакі з АМАПаўцамі і тут пачаўся гвалт і абразы. Яны прыбеглі да нас, азвярэлыя, крычалі, лаяліся, гаварылі, што мы ваенныя злачынцы і нам трэба папраломліваць галовы.

Мяне адпусцілі, але адную сяброўку трымалі 72 гадзіны, сваякі не ведалі, дзе яна. Аказалася, што была ў Жодзінскай турме. Калі выпускалі, моцна ўдарылі дубінкай па галаве, хоць яна кажа, што ёй пашанцавала, бо збівалі менш, чым іншых».

Майстру музычных інструментаў сілавікі знявечылі пальцы, наступалі нагамі на шыю і галаву

«Вы замбаваныя, мы б вас усіх пазабівалі»

Вольга, Менск

Вольга выходзіла 9 і 10 жніўня на пратэст у якасці валанцёркі. Затрымалі дзеўчыну 11 жніўня ля парку Дружбы народаў.

«Мы былі ў белых халатах. Як валанцёры выходзілі памагаць параненым. Калі нас затрымлівалі, мы гаварылі, што мы дактары, але ніхто не слухаў. Нас затрымлівалі вайскоўцы ў зялёнай форме, завезлі ў РУУС Цэнтральнага раёну.

Не збівалі, але прыніжалі. Гаварылі: вы замбаваныя, мы б вас усіх пазабівалі.

Мы хацелі памагчы параненым і збітым, але яны крычалі, што мы не тым пайшлі памагаць. Адна дзяўчына не хацела падпісваць пратакол, які быў напісаны пад капірку, ёй пагражалі збіццём, таму яна падпісала. Я баялася за сваё здароўе, таму таксама вырашыла падпісаць».

«Яны білі мяне як мяса». Напалі на машыну, катавалі, зрабілі фігурантам крымінальнай справы

19 жніўня, пасля непрацяглай паўзы, беларускія сілавікі аднавілі затрыманні актывістаў, якія патрабуюць адстаўкі дзейнага кіраўніка краіны з пасады прэзідэнта. За час пратэстаў у Беларусі, паводле МУС, былі затрыманыя каля 7000 чалавек. Шмат хто з іх заяўляе пра збіццё і катаванні. Ёсць і загінулыя, але афіцыйнага расследавання смерці ўдзельнікаў пратэсту сілавікі не распачынаюць.

  • 10 жніўня ў Менску загінуў 34-гадовы Аляксандр Тарайкоўскі, які, паводле відэакрыніц, быў застрэлены на месцы. Афіцыйна ў МУС заяўлялі, што ў яго руках выбухнуў невядомы прадмет.
  • У Гомлі 11 жніўня памёр 25-гадовы Аляксандр Віхор, якога затрымалі 9 жніўня.
  • 16 жніўня загінуў 19-гадовы Арцём Парукаў, афіцыйна яго збіла машына на Партызанскім праспекце.
  • 19 жніўня у вайсковым шпіталі Менску памёр 43-гадовы Генадзь Шутаў. Яго паранілі ў галаву 11 жніўня ў раёне Маскоўскай адміністрацыі Берасця падчас пратэстаў.
  • У Ваўкавыску знайшлі цела 29-гадовага Канстанціна Шышмакова, які будучы чальцом участковай камісіі адмовіўся падпісваць выніковы пратакол. З ім развіталіся 20 жніўня, родныя адмовіліся каментаваць смерць журналістам. Прычыны смерці пакуль невядомыя.

Дар’я Курачкіна belsat.eu

Hавiны