Каталіцкіх святароў мусілі судзіць 9 снежня ў Віцебску, але суддзя пастанавіла дапрацаваць іхныя справы. Пра гэта паведамляе радыё «Рацыя».
У другой палове дня 8 снежня ў Віцебску былі затрыманыя айцец Віктар Жук, езуіт, пробашч мясцовай парафіі святога Уладзіслава, айцец Аляксей Варанко, вікарый грэка-каталіцкай парафіі Уваскрасення Хрыстовага, ды іхны сябар Аляксей Каракоў.
Усіх траіх міліцыянты затрымалі ўчора непадалёк ад гандлёвага цэнтру «GREEN» і склалі пратаколы за несанкцыянаванае пікетаванне. Падчас суду, які праз Skype вёў суддзя Міхаіл Юрчанка, усе трое тлумачылі, што не ладзілі пікет, а маліліся за жыхароў Беларусі. Пры гэтым Аляксей Варанко трымаў бел-чырвона-белы сцяг.
Суд пастанавіў, што ў дакументах справаў недастаткова звестак, каб прыняць рашэнне. Таму афіцыйныя паперы накіравалі на дапрацаванне ў Першамайскі РАУС.
У ізалятары часовага ўтрымання сваякам падсудных паведамілі, што яны вольныя. Дата працягу судовага працэсу пакуль не вядомая.
Нагадаем, што зараз за кратамі знаходзяцца паводле адміністратыўных справаў рыма-каталіцкі святар з Расонаў Вячаслаў Барок і грэка-каталіцкі святар з Івацэвічаў Віталь Быстроў.
Апроч таго, у межах крымінальнай справы Мікалая Аўтуховіча затрыманы праваслаўны святар з Жабінкаўскага раёну Сяргей Рэзановіч.
МГ belsat.eu
