Кіроўца грузавіка павесіўся ў кабіне свайго грузавіка праз закрытую мяжу з Польшчай.
Трагедыя адбылася ў літоўскай Клайпедзе, дзе сабралася вялізарная колькасць машын, якія чакаюць парому ў нямецкі Кіль. Менавіта такі маршрут выкарыстоўваюць расейскія цяжкавікі пасля закрыцця для іх польскай мяжы.
Кіроўцы з аўтамабільнай чаргі ў Клайпедзе кажуць, што 43-гадовы жыхар Пскова скардзіўся на праблемы са сваім «Мэрсэдэсам», а таксама баяўся, што ўладальнік бізнэсу можа яго звольніць.
Дарога да марскога тэрміналу ў Клайпедзе забітая расейскімі машынамі больш за тыдзень, увесь гэты час кіроўцы жывуць у кабінах. Жыхары Клайпеды заклапочаныя, што па дарозе немагчыма праехаць нават легкавым аўтамабілямі – рух цалкам заблакаваны.
Дарога на Захад для расейскіх тавараў, як і шлях фураў з Еўропы ў Расею цяпер ляжыць праз Балтыку.
Расейскае міністэрства транспарту і польскае міністэрства інфраструктуры і будаўніцтва не здолелі дамовіцца пра працяг дазволаў для транспартных кампаніяў на 2016 год. Тэрмін папярэдніх дазволаў скончыўся 1 лютага.
Шляхі праз Украіну Расея даўно блакуе.
ДД