Падчас кантролю на пункце пропуску «Буг» памежнікі затрымалі мужчыну, які спрабаваў трапіць у Польшчу на грузавым цягніку. Мужчына схаваўся пад вагонам і чакаў, пакуль цягнік пачне рух, каб непрыкметна на яго залезці, паведамляе прэсавая служба Дзяржаўнага памежнага камітэту.
Памежнікі затрымалі парушальніка, выявілі ў яго толькі пашпарт і некаторыя асабістыя рэчы. Мужчына апынуўся грамадзянінам Расеі, а ў прыватнасці, жыхаром Цюмені. Мужчына не стаў адмаўляць незаконнасць сваіх намераў. Расеец растлумачыў, што спланаваў парушэнне мяжы з мэтай пошуку лепшых умоваў жыцця ў краінах Еўразвязу.
Расейсца прыцягнулі да адміністрацыйнай адказнасці паводле артыкулаў 23.29 і 23.32 (незаконнае перасячэнне мяжы і парушэнне рэжыму ў пункце пропуску) КаАП Беларусі. За гэта яму пагражаюць штраф і дэпартацыя з забаронай уезду ў Беларусь тэрмінам на 5 гадоў.
Яшчэ адно парушэнне памежнікі выявілі на Гарадзеншчыне. Тут, у памежнай зоне затрымалі грамадзянаў Ірану, якія дабіраліся да мяжы на таксі. Правапарушальнікі прызналіся, што планавалі незаконна перасекчы мяжу ў пошуках лепшых умоваў жыцця ў краінах ЕЗ. З сабой у іх былі цёплыя рэчы, ежа і валюта.
У выніку кожнага аштрафавалі на 30 базавых велічыняў і дэпартавалі з Беларусі з забаронай уезду ў краіну тэрмінам на 5 гадоў. Кіроўца таксі прыцягнуты да адказнасці за аказанне дапамогі правапарушальнікам.
СК belsat.eu