У горадах Алматы, Нур-Султан і Шымкент сотні чалавек выйшлі на акцыі пратэсту: яны заклікалі да байкоту выбараў прэзідэнта Казахстану, бо лічаць іх несправядлівымі, а вынік – прадвызначаным. Пра гэта паведамляе azattyq.org.
Дэманстранты ў горадзе Алматы скандавалі «Байкот!» і «Паліцыя з народам». Паліцыянты, у тым ліку байцы спецпадраздзяленняў, груба затрымлівалі ўдзельнікаў мірнай акцыі пратэсту і запіхвалі іх у аўтазакі. Затрыманыя больш за 100 удзельнікаў акцыі, пішуць СМІ.
Сілавікі затрымалі не толькі пратэстоўцаў, але таксама журналістаў (у тым ліку карэспандэнта AFP Крыса Рыклтана) і праваабаронцаў.
У Нур-Султану на пратэсты выйшлі некалькі сотняў грамадзянаў, патрабуючы правядзення сумленных выбараў. Людзі скандавалі «Алга, Казахстан!», «Бостандык!» («Свабода!»). Дэманстрантаў блакавалі сілавікі, пачаліся затрыманні.
https://www.facebook.com/100005639267279/videos/1097873413743957/
Затрымання каля 20 чалавек прайшлі і ў Шымкенце. Тут людзі нічога не скандавалі, аднак паліцэйскія ўсе роўна заштурхалі іх у машыны.
Першы намеснік міністра ўнутраных спраў Марат Кажаеў паведаміў, што агулам за арганізацыю і ўдзел у несанкцыянаваных мітынгах у краіне затрыманыя каля сотні чалавек.
***
У Казахстане 9 чэрвеня адбываюцца датэрміновыя выбары кіраўніка дзяржавы. Бясспрэчным фаварытам з’яўляецца выканаўца абавязкаў прэзідэнта Касым-Жамарт Такаеў, які замяніў на пасадзе кіраўніка Казахстану Нурсултана Назарбаева. На думку шэрагу палітолагаў, перамога Такаева не выклікае сумневаў, а галоўная інтрыга ў тым, хто зойме другое месца.
ІІ belsat.eu
