Паляк зарабіў на беларускіх рабах мільён еўраў


Дапамагалі 42-гадоваму мужчыну «адмываць» грошы дзве жыхаркі Паморскага ваяводства.

Паліцыя выйшла на ашуканцаў у кастрычніку летась. Фірма падазраванага займалася нелегальным працаўладкаваннем іншаземцаў і мясцовых жыхароў на будоўлі ў Польшчы і Швецыі.

Шукалі ахвяраў праз рэкламу ў інтэрнэце і ў агенцтвах занятасці. Сярод працаўнікоў былі беларусы, украінцы, грузіны, малдаване. Людзей правяралі на ўспрымальнасць да маніпуляцыяў і паслухмянасць.

З імі не падпісвалі ніякіх дамоваў або падрыхтоўвалі на мове, якой яны не маглі зразумець, забіралі пашпарты, не выплочвалі заробку або толькі яго мізэрную частку. Нязгодным пагражалі дэпартацыяй, запалохвалі, прыніжалі і нават білі.

Злачынцы маглі прымусіць да працы больш за 540 чалавек і зарабіць больш як 4,5 млн злотых (больш за 1 млн еўраў).

Атрыманыя сродкі мужчына ўкладваў у свой легальны бізнес.

Затрыманых жанчын абвінавачваюць у адмыванні грошай. Мужчыну арыштавалі на тры месяцы. Справай займаецца пракуратура Гданьску. Яму прад’явілі абвінавачванне ў гандлі людзьмі. За гэта яму пагражае ад 3 гадоў турмы.

ДР, belsat.eu

Глядзі таксама
Каментары