Тэлеканал ОНТ заяўляе пра высокі ўзровень даверу дзейнаму кіраўніку Беларусі. Вынікі адпаведнага сацыялагічнага апытання ён прадставіў 28 ліпеня.
Як заяўляецца, апытанне 23-27 ліпеня на замову ОНТ праводзіў аналітычны цэнтр Ecoom, якім кіруе чалец грамадска-кансультатыўнага савету пры Міністэрстве адукацыі, чалец праўлення Саюзу пісьменнікаў Беларусі Сяргей Мусіенка.
Паводле апытання, удзел у галасаванні плануюць прыняць 89,5 % насельніцтва (два тыдні таму такіх было 87,3 %). Да датэрміновага галасавання станоўча ставіцца 61,4 %.
Аляксандра Лукашэнку гатовыя падтрымаць 72,3 % беларусаў, а рэйтынгі астатніх складаюць сумарна 10 %.
Узровень даверу дзейнаму кіраўніку краіны складае 78,1%.
З крыніц інфармацыі аб ходзе выбарчай кампаніі найбольшы давер у насельніцтва выклікаюць тэлебачанне (65,4 %), інтэрнэт-медыі (43,2 %), а таксама непасрэднае сацыяльнае асяроддзе (сябры, знаёмыя, сваякі – у цэлым па рэспубліцы 25,7 %).
Агульны сацыяльны фон электаральнай кампаніі характарызуецца перавагай у грамадстве аптымістычных настрояў (62,8 %). Занепакоенасць і няўпэўненасць у будучыні выказваюць 17,2 %.
МГ belsat.eu
