Адным з галоўных поспехаў Аб’яднанага пераходнага Кабінету ў замежнай палітыцы стала ўмацаванне інстытуцыянальных сувязяў з партнёрамі, паведамляе Кабінет у сацыяльных сетках.
Прыкладам такіх сувязяў сталі дзве сустрэчы Кансультатыўнай групы «Беларусь – ЕЗ», пачатак Стратэгічнага дыялогу з ЗША, прызначэнні шэрагам краінаў адмысловых пасланнікаў у справах Беларусі.
«Гэта забяспечыць стабільнасць у нашай супрацы, а таксама замацуе месца Беларусі ў міжнародным парадку дня і замежнапалітычным планаванні дэмакратычных краінаў», – кажа прадстаўнік у замежных справах Кабінету Валер Кавалеўскі.
Таксама ў поспехі Кабінет запісвае:
- прыняцце стратэгічнай мэты інтэграцыі Беларусі ў Еўразвяз;
- запуск праекту новага нацыянальнага пашпарта;
- паглыбленне супрацы ў міграцыйнай праблематыцы, прыняцце справаздачы ПАРЕ пра выклікі для беларусаў у краінах Еўропы;
- паразу Лукашэнкі на выбарах у Раду Бяспекі ААН, дзе той здолеў набраць менш за 20 % галасоў дзяржаваў пасля 16 гадоў рыхтавання.
«Нашы асноўныя задачы – захаванне незалежнасці, ціск на рэжым, інстытуцыялізацыя адносінаў з партнёрамі, пашпарт, еўрапейскі выбар, рашэнні для міграцыйных праблемаў», – працягвае Кавалеўскі.
Палітык прызнае, што беларускім дэмакратычным сілам патрэбныя дадатковыя намаганні і сустрэчныя дзеянні партнёраў, каб дабіцца яшчэ лепшых вынікаў у пазначаных кірунках.
«Наступны год павінен стаць часам для практычных рашэнняў ва ўсіх адзначаных задачах. Шмат зроблена для навязання кантактаў, наладжвання адносінаў і дасягнення паразумення ў наступных кроках. Цяпер нам патрэбны рэальны прагрэс у рэалізацыі гэтага патэнцыялу. Для гэтага трэба будзе мабілізаваць волю нашых партнёраў і ператварыць яе ў сфакусаваныя, скаардынаваныя, паслядоўныя дзеянні на карысць дэмакратычнай, незалежнай, суверэннай, еўрапейскай Беларусі», – падводзіць рысу Валерый Кавалеўскі.
Арсен Рудэнка belsat.eu
