Расея збіраецца спрасціць атрыманне грамадзянства з прычыны «несяброўскага стаўлення» да расейцаў
Адмысловы праект аб зменах у Закон аб грамадзянстве Расейскай Федэрацыі быў унесены ў Дзярждуму. Навінны партал rg.ru, паведамляе, што заканадаўцы плануюць максімальна спрасціць атрыманне расейскага грамадзянства для цэлага шэрагу асоб, якія жывуць за межамі Расеі, але маюць расейскія карані. Найперш змены будуць датычаць украінцаў і беларусаў.
Калі папраўкі набудуць законную сілу, то яны зменяць парадак прыёму ў грамадзянства РФ замежнікаў і людзей без грамадзянства, калі нацыянальнасць хаця б аднаго з бацькоў такога чалавека запісаная ў пасведчанні аб нараджэнні як «расеец».
Новы закон збіраецца пераасэнсаваць панятак «суайчыннік». Суайчыннікамі змогуць стаць усе жыхары тэрыторый былога СССР ці дарэвалюцыйнай Расеі, якія, паводле стваральнікаў закону, гістарычна жывуць на тэрыторыі Расеі і валодаюць расейскай мовай.
Для такіх замежнікаў скасуюць умову аб бесперапынным пражыванні на тэрыторыі Расеі на працягу пяці гадоў. Ім не трэба будзе спачатку атрымліваць від на жыхарства, а потым прасіць аб грамадзянстве. Не спатрэбіцца і пацвярджаць, што ў іх ёсць законная крыніца сродкаў для існавання. Іспыт на веданне расейскай мовы таксама адмяняецца. Тэрмін атрымання грамадзянства скароціцца да 3 месяцаў.
Заканадаўчую прапанову ўнёс у Дзярждуму Канстанцін Затулін, першы намеснік старшыні камітэту Дзярждумы ў справах СНД, еўразійскай інтэграцыі і сувязяў з суайчыннікамі, сябра «Единой России». Паводле дэпутата, такая захада – адказ на рост нядобразычлівага стаўлення да расейцащ і носьбітаў расейскай мовы на Захадзе.
Нагадаем, што папярэднія змены ў Закон аб грамадзянстве РФ былі щнесеныя ў 2014 годзе на фоне канфлікту на Данбасе і акупацыі Крыму.
ХЗ belsat.eu
