Сёння праваабаронца Алесь Бяляцкі адзначае дзень нараджэння. Яму спаўняецца 61 год. Гэта ўжо трэці дзень нараджэння запар, якія спадар Алесь сустракае за кратамі.
Свае віншаванні Алесю Бяляцкаму ў сваім Telegram-канале апублікавала беларуская дэмакратычная лідарка Святлана Ціханоўская.
«Сёння дзень нараджэння ў нашага нобэлеўскага лаўрэата, старшыні праваабарончага цэнтру «Вясна» Алеся Бяляцкага.
Шаноўны спадар Алесь, я памятаю вашыя словы: бывае так, што людзі, якія найбольш цэняць свабоду, часта пазбаўленыя яе. І мне вельмі сумна бачыць тое, як гэтыя словы сталі беларускай рэальнасцю.
Усё жыццё вы, паважаны Алесь, працягваеце змагацца за свабоду і правы беларусаў. А нашая задача зараз – працягваць вашую справу. Нават у зняволенні вы працягваеце натхняць і падтрымліваць усіх нас. Бо вы лепш за ўсіх нас ведаеце, што пасля зімы заўсёды наступае Вясна.
Дарагі Алесь, жадаю вам моцнага здароўя і як мага хутчэй апынуцца побач з сям’ёй і паплечнікамі», – напісала абраная прэзідэнтка Беларусі.
Нагадаем, што заснавальнік і кіраўнік праваабарончага цэнтру «Вясна» быў затрыманы 14 ліпеня 2021 года. Яго абвінавацілі ў «кантрабандзе» ды «фінансаванні групавых дзеянняў, што груба парушаюць грамадскі парадак» і асудзілі на 10 гадоў калоніі. Ні ў адным з артыкулаў, выстаўленых судом, Алесь Бяляцкі не прызнаў віны.
У снежні 2022 года, калі ён ужо быў за кратамі, Алеся Бяляцкага ўганаравалі Нобэлеўскай прэміяй міру. Узнагароду атрымлівала ягоная жонка Наталля Пінчук.
У траўні 2023 года кіраўнік «Вясны» быў этапаваны ў папраўчую калонію № 9 у Горках. Гэтая калонія мае дурную славу, дзе зняволеныя, асабліва паводле палітычных артыкулаў, зазнаюць сапраўдныя катаванні.
Раман Шавель belsat.eu
