У некаторых гарадах Берасцейшчыны, размешчаных непадалёку ад мяжы з Украінай, сілавікі масава затрымліваюць людзей. Прычынаў для такіх «хапуноў» не агучваюць, нібыта ладзяцца ператрусы ў межах нейкай крымінальнай справы. Мясцовыя жыхары запалоханыя і кажуць, што затрыманні звязаныя з нейкімі вучэннямі вайскоўцаў. Эксперты, з якімі паразмаўляў «Белсат», адзначаюць, што прычынай для такіх захадаў сілавікоў можа быць як унутрыпалітычная сітуацыя, так і вайна ва Украіне.
Праваабаронцы паведамлялі пра масавыя затрыманні ў Іванаве і Драгічыне. Як стала вядома «Белсату», у рэгіёнах «працавалі» байцы ГУБАЗіКу з Менску і Берасця пры падтрыманні амапаўцаў. Сілавікі са зброяй урываліся ў дамы палешукоў, учынялі ператрусы, забіралі грошы, камп’ютары, мабільныя тэлефоны. Пазней затрыманых судзілі за нібыта непадпарадкаванне міліцыянтам і прысуджалі вялізныя штрафы. Некаторых затрыманых асудзілі на содні адміністратыўнага арышту.
Відавочцы распавялі «Белсату», што 18 ліпеня адбыўся суд над Марынай Кіевец. Жанчына не дала сілавікам пароляў да свайго Telegram. У выніку на яе склалі тры пратаколы, у якіх абвінавацілі яе ў распаўсюдзе «экстрэмізму». Прычым з моманту затрымання, з серады 13 ліпеня, яна застаецца ў ІЧУ. За кожны пратакол яе судзяць асобна і змяшчаюць у ізалятар на 72 гадзіны да наступнага суда. 18 ліпеня яе судзілі за тое, што яна пераслала «экстрэмісцкі» матэрыял з лагатыпам «Белсату» ў прыватных паведамленнях сяброўцы. Жанчына распавяла, што ў ІЧУ для палітычных асаблівыя ўмовы – у іх забралі кнігі, на дзень забіралі матрацы. Перадаваць дазволілі толькі цёплае адзенне, а ежу і ваду забаранілі.
Агулам у Іванаве затрымалі 6 асобаў. Аднаго затрыманага білі патэльняй па азадку, мужчына моцна збіты.
У Алены Пуцыковіч, былой настаўніцы, якой раней прысудзілі «хімію», здарыўся крывацёк, яна цяпер у больніцы. Супраць былой настаўніцы могуць завесці крымінальную справу і ўключыць яе ў спіс тэрарыстаў.
Людзі не ведаюць, што стала прычынаю арыштаў. У горадзе кажуць, што магчыма, гэта звязана з нейкімі вучэннямі вайскоўцаў. Але якімі – ніхто не ведае.
Некаторыя жыхары раёну на ўмовах ананімнасці кажуць, што пэўны час таму вайскоўцы ў ваколіцах разгружалі тэхніку. Але падрабязнасцяў ніхто не ведае. Палітолаг Павел Вусаў у сваім Telegram-канале паведамляе, што за мінулыя дні чыгункаю на ўчастку Пінск – Драгічын прайшло не меней як тры эшалоны з вайсковай тэхнікай. Вызначыць прыналежнасць тэхнікі няма магчымасці – нумары і знакі зафарбаваныя белай ці светла-шэрай фарбай.
Афіцыйна на сайце Мінабароны няма інфармацыі пра вучэнні вайскоўцаў у рэгіёнах, дзе сілавікі чынілі аблавы. Вайсковыя аглядальнікі таксама не валодаюць інфармацыяй пра нейкія манеўры. Але нягледзячы на адсутнасць інфармацыі, ёсць падставы меркаваць, што беларуская армія цяпер павялічыла прысутнасць на беларуска-ўкраінскай мяжы. Раней у Кіеве лічылі, што Менск сканцэнтраваў на памежжы 7 батальённа-тактычных групаў, кожная з якіх налічвае ад 600 да 800 вайскоўцаў. Але на дзяржаўным ТБ палкоўнік Ігар Гедзіч распавёў, што ў межах захадаў на ўмацаванне паўднёвай мяжы туды перакінулі 8 БТГ, што складае ад 4800 да 6400 вайскоўцаў.
Намеснік камандуючага ВПС і войскамі СПА ВС Беларусі Дзмітрый Міхалап у эфіры дзяржаўнага ТБ распавёў, што Беларусь атрымала з Расеі зброю і чакае яшчэ паставак.
«На ўзбраенне нашай арміі паступілі і ўжо дастаткова паспяхова асвоеныя зенітна-ракетныя комплексы «Тор М2», што ўдзельнічаюць у мерапрыемствах баявога і аператыўнага рыхтавання на палігонах Расейскай Федэрацыі. Асвоены самалёт Су-30СМ. Зусім нядаўна мы атрымалі найноўшы трэнажор самалёта Су-30СМ, што дазволіць ашчадзіць не толькі рэсурс саміх самалётаў, але і значна падвысіць узровень падрыхтаванасці нашых пілотаў. У найбліжэйшай перспектыве прапрацоўваецца пытанне і ў найбліжэйшай перспектыве з’явіцца ў нас на ўзбраенні ўдарны верталёт Мі-35, а таксама зенітна-ракетная сістэма С-400», – паведаміў Дзмітрый Міхалап.
Дзе будзе размешчаная пастаўленая з РФ зброя – не паведамляецца. Але ёсць імавернасць, што ўсё гэта будзе выкарыстоўвацца Крамлём у вайне супраць Украіны.
Палітолаг Павел Вусаў у размове з «Белсатам» кажа, што апошнімі часамі на межах з Украінай у Беларусі адбываецца даволі актыўнае перасоўванне войскаў. Сітуацыя ў гэтых памежных рэгіёнах адлюстроўваецца ў канале «Беларускі Гаюн». Людзі паведамляюць пра прысутнасць і расейскіх войскаў, а тут яна застаецца даволі вялікай.
«Варта таксама нагадаць, што Расея ва Украіне распачынае чарговую хвалю наступу. Пуцін загадаў распачаць наступ на ўсходзе Украіны, загадаў павялічыць канцэнтрацыю войскаў у Херсонскай вобласці. А каб расцягнуць сілы ўкраінскага войска, Крэмль хоча стварыць на ўкраінска-беларускай мяжы напружанасць, імавернасць правакацыяў. Можам спекуляваць, будзе Лукашэнка браць удзел у вайне або не, але факт павышэння напружанасці ў памежных рэгіёнах ёсць ключавым для расейскай стратэгіі вядзення вайны. Таму і гэта таксама паўстае прычынай масавых арыштаў у рэгіёнах, паколькі Расея такім чынам вядзе інфармацыйную зачыстку. Імкнецца задушыць актыўнасць у сацыяльных сетках, асабліва тых людзей, якія былі засвечаныя ў нейкай актыўнасці на працягу апошніх двух гадоў. Вось таму гэта і стэрылізуецца максімальна», – лічыць палітолаг.
Ці завершацца гэтыя адвольныя затрыманні пасля таго, як стабілізуецца сітуацыя на франтах, Павел Вусаў не бярэцца прагназаваць, але, на ягоную думку, магчыма, мы назіраем увогуле сістэмную зачыстку, выцісканне актыўнасці, якое будзе і надалей у Беларусі.
«Напярэдадні другой гадавіны палітычнага крызісу, які мае вельмі важнае сімвалічнае значэнне (нават нягледзячы на тое, у якім стане цяпер беларускае апазіцыйнае грамадства), тэрор з боку беларускіх уладаў не слабее. Наадварот, на працягу апошніх двух месяцаў колькасць прысудаў і арыштаў застаецца на даволі высокім узроўні. Арыштоўваюць практычна ўсіх, хто меў дачыненне да апазіцыйнай актыўнасці. Да гэтага варта дадаць, што берасцейскі рэгіён таксама меў даволі высокую інтэнсіўнасць пратэстаў у 2020 годзе. І да Берасця, і да Горадні стаўленне іншае і павышаны кантроль», – кажа палітолаг.
Павел Вусаў таксама нагадвае, што ў Берасце, напрыклад, Лукашэнка накіраваў спецпрадстаўніком былога старшыню КДБ Валерыя Вакульчыка. Таму сілавы кантэкст мае асаблівы характар.
Мікалай Каткоў belsat.eu