Нацбанк апублікаваў статыстыку вонкавага гандлю Беларусі ў студзені–верасні. Сальда вярнулася ў дадатныя паказнікі пасля трох месяцаў дэфіцыту: экспарт за дзевяць месяцаў перавысіў імпарт на $538 млн.
Тры месяцы запар Нацыянальны банк паведамляў пра адмоўнае сальда вонкавага гандлю, напрыклад, у студзені–ліпені яно амаль дасягнула $100 млн год да года. Аднак у верасні гэтую тэндэнцыю атрымалася зламаць.
За дзевяць месяцаў экспарт перавысіў імпарт на $537,9 млн. Праўда, імпарт расце сёлета шпарчэй за экспарт у параўнанні з студзенем–вераснем летась (17,7% супраць 4,8%). А дадатнае сальда тады перавышала $4 млрд.
Агульную статыстыку ратуе знешнегандлёвы зварот паслугаў, іх экспарт за дзевяць месяцаў сёлета перавысіў імпарт на $2,1 млрд. З таварамі – усё наадварот: адмоўнае сальда за студзень–верасень – $1,6 млрд.
Пры гэтым і з паслугамі сітуацыя выглядае не лепшым чынам, бо іх экспарт скараціўся год да года на 6,7%, імпарт вырас на 17,2%, а дадатнае сальда зменшылася на 33,5%.
Як раней папярэджвалі эканамісты, адмоўнае сальда беларускага вонкавага гандлю цягам паўгода пагражала б дэвальвацыяй і разгонам інфляцыі.
СК belsat.eu
