«Белсат» падводзіць вынікі 720-х содняў поўнамаштабнай вайны, распачатай Расеяй ва Украіне. Пра галоўныя падзеі станам на вечар 13 лютага чытайце ў нашым аглядзе.
Купянскі і ліманскі кірункі (паўночна-ўсходняя частка Харкаўскай вобласці, захад Луганскай і поўнач Данецкай)
На паўночным усходзе Харкаўскай вобласці працягваюцца баі ў ваколіцах гораду Купянск. У Генеральным штабе Збройных сілаў Украіны паведамілі пра няўдалыя атакі праціўніка каля населеных пунктаў Сынькоўка і Табаеўка. Паводле Міністэрства абароны РФ, побач з першым сялом атакуюць і ўкраінскія вайскоўцы, што ўказвае на сустрэчны характар баёў на гэтым участку фронту. Між тым зменаў на купянскім кірунку не фіксуе ніводная з крыніцаў.
На суседнім ліманскім кірунку асноўныя баі лакалізуюцца на так званым торскім выступе на поўначы Данецкай вобласці.
Расейскае камандаванне заявіла пра адбіццё атак праціўніка ў ваколіцах населеных пунктаў Церны, Торскае і Ямпалаўка, а таксама пра паляпшэнне становішча па пярэднім краі.
Генштаб ЗСУ фіксуе безвыніковыя атакі расейцаў на гэтым участку каля Цернаў. Акрамя гэтага войскі РФ атакавалі ніжэй па лініі фронту ў ваколіцах Вясёлага, але і тут не дасягнулі поспеху.
Бахмуцкі кірунак (лінія фронту ў ваколіцах аднайменнага гораду ў Данецкай вобласці)
На бахмуцкім кірунку ініцыятыва застаецца за расейскімі вайскоўцамі, якія наступаюць у ваколіцах населеных пунктаў Багданаўка, Іванаўскае, Клішчыеўка і Андрэеўка, імкнучыся выйсці да суседняга гораду Часаў Яр.
Генштаб ЗСУ піша пра сем няўдалых атак праціўніка на гэтых участках фронту.
Расейскі ваенкор Сямён Пегаў мяркуе, што баі каля Багданаўкі, Іванаўскага і Клішчыеўкі маюць сустрэчны характар. Пры гэтым зменаў лініі фронту не фіксуецца.
Аўдзееўскі і мар’інскі кірункі (на поўначы і захадзе ад Данецку)
Найбольшая інтэнсіўнасць наступальных дзеянняў Узброеных сілаў РФ адзначаецца ў ваколіцах Данецку.
На аўдзееўскім кірунку, паводле ўкраінскага камандавання, толькі за апошнія содні сілы абароны краіны адбілі 22 атакі праціўніка ў самой Аўдзееўцы, а таксама яшчэ 7 – каля сёлаў Танэнькае і Невельскае.
Між тым Пегаў гаворыць, што расейцы прасунуліся на паўднёвым і паўночным усходзе гораду. У прыватнасці, ваенкор сцвярджае, што на апошнім участку яны выйшлі да Індустрыяльнага праспекту, які з’яўляецца галоўным лагічным маршрутам ЗСУ.
Расейскі ваенны эксперт Барыс Рожын удакладняе, што на поўдні гораду войскі РФ прасунуліся з ваколіцаў умацаванага раёну «Царська охота» у бок сяла Невельскага. Адначасова фіксуецца рух насустрач з самога Невельскага.
На мар’інскім кірунку Узброеныя сілы РФ не менш за 35 разоў атакавалі каля населеных пунктаў Георгіеўка, Пабеда і Новаміхайлаўка.
Тэлеграм-канал «Рыбарь» піша, што УС РФ прасунуліся ў кірунку сяла Пабеда і ўзялі пад свой кантроль участак трасы Т05-24 і шэраг лесапасадак з поўдня да ўскрайкаў самога населенага пункту.
Барыс Рожын гаворыць, што ніжэй па фронце расейцы распачалі штурм сяла Новаміхайлаўка.
Бярдзянскі, мелітопальскі і херсонскі кірункі (лінія фронту на поўдні Данецкай вобласці, а таксама ў Запарожскай і Херсонскай вобласцях)
На поўдні Данецкай вобласці войскі РФ атакавалі ў ваколіцах сяла Прачыстаўка (на ўсходзе ад гораду Вуглядар), але сілы абароны Украіны ўтрымалі свае пазіцыі.
У Запарожскай вобласці працягваюцца сустрэчныя баі на выступе па фронце з поўдня ад гораду Арэхаў каля сёлаў Вэрбовае, Навапрокапаўка і Работына – таксама без поспехаў любога з бакоў.
Агулам на поўдні краіны інтэнсіўнасць баявых дзеянняў ніжэйшая ў параўнанні з усходам.
На іншых участках фронту адзначаюцца лакальныя пазіцыйныя баі, а таксама артылерыйскія абстрэлы ўздоўж лініі сутыкнення.
Ва ўмовах актыўных баявых дзеянняў журналісты не маюць магчымасці аператыўна правяраць афіцыйныя паведамленні ўдзельнікаў вайны.
Наталля Кулыгіна belsat.eu
