Ва ўкраінскай сталіцы пачаў сваю працу беларуска-ўкраінскі валанцёрскі хаб, куды могуць прыйсці па дапамогу як беларусы, так і ўкраінцы. Галоўнай мэтай хабу з’яўляецца фармаванне цэнтралізаванай пляцоўкі для сумеснага дыялогу, узаемадапамогі і валанцёрскага руху беларусаў ва Украіне. А таксама дапамога ЗСУ і беларускім добраахвотнікам на фронце.
Удзельнікамі сустэчы выступілі беларуская актывістка і валанцёрка Ірына Лукашэнка, беларуская дзяячка Алёна Жаркевіч, кіраўнік ГА «Агенцтва развіцця дэмакратыі і інфармацыйных свабодаў» Юрый Федарэнка, дарадца Украінскай асацыяцыі раённых і абласных радаў Іван Фурсэнка і блогерка Таццяна Мартынава.
«Хто мы такія? Мы беларусы і мы не рэжым Лукашэнкі. Тут, ва Украіне, мы аказаліся ўсе таму, што ўцякалі са сваёй краіны. Мы вельмі ўдзячныя Украіне за тое, што яна нас прыняла і падтрымала. У нас адзіны вораг і мы будзем усё разам з ім змагацца» – кажа арганізатарка ініцыятывы Алена Жаркевіч.
«У мінулым годзе, калі пачалася актыўная фаза вайны, мне выпаў гонар узначальваць Кіеўскі абласны цэнтр добраахвотнікаў. І на маё глыбокае здзіўленне, амаль кожны трэці ў гэтым цэнтры быў беларусам. Яны натхнёна працавалі і шмат рабілі, ня менш за ўкраінцаў: вывозілі людзей разам з нашымі ўкраінцамі з Ірпіня, дастаўлялі лекі на часова акупаваную тэрыторыю Кіеўскай вобласці і я гэта бачыў на свае вочы, не з гісторый каго-небудзь», – распавядае Юрый Федарэнка.
«Мы хочам быць больш бачнымі. Бо наш беларускі валанцёрскі рух быў ад пачатку, з першых дзён поўнамаштабнага ўварвання Расеі, каб украінцы больш пра нас ведалі і разумелі, што беларусы – гэта не толькі афіцыйная Беларусь», – распавяла беларуска Ірына Лукашэнка.
У планах дзейнасці хабу некалькі фарматаў працы:
- дапамога байцам, якія зараз знаходзяцца на перадавой – і беларусам, і ўкраінцам;
- кансультацыйная дапамога;
- прыцягненне спецыялістаў для вырашэння праблем у юрыдычнай сферы (ад легалізацыі беларусаў ва Украіне да любых іншых праблемных пытаннях), выкарыстанне дарожных карт па розных пытаннях;
- садзейнічанне ў рэалізацыі сумесных ініцыятыў (узаемадзеянне з органамі дзяржаўнай улады, садзейнічанне ў складанні грантавых заявак у якасці выканаўцы праектаў).
Агата Квяткоўская belsat.eu
